Hatutan.com, (18 Abríl 2024), Díli—Prezidente Repúblika (PR), José Ramos-Horta kontente no parabeniza Tribunál Rekursu (TR) ne’ebé liberta António da Conceição “Kalohan” hosi pena prizaun efetivu tinan lima ne’ebé fó hosi Tribunál Judisiál Primeira Instánsia Díli (TJPID).

António da Conceição Embaixadór Timor-Leste bá Repúblika Indonézia, simu pose iha Palásiu Prezidensiál Nicolau Lobato Bairru- Pité, Tersa (12/12/2023). Foto: Elio dos Santos da Costa.

“Ha’u kontente no hein katak kazu seluk Tribunál Rekursu sei haree ida-ne’e. Ha’u rona Governu mós hakarak haree auditoria iha seitór justisa la’ós tanba kontra justisa. Auditoria atu haree saida mak tenke hadi’a,” Prezidente Repúblika hateten iha edifísiu INFORDEPE, Balide, Kinta (18/04/2024).

Lee Mós: Tribunál Rekursu Absolve António “Kalohan” Hosi Pena Prizaun Tinan-Lima

Ramos-Horta hatutan, hanesan Xefe Estadu kontente bainhira rona António da Conceição “Kalohan” nia naran finalnalmente hamoos.

“Parabens bá Tribunál Rekursu ne’ebé haree dalan loos no kontente bá António da Conceicao,” nia tenik.

Iha 12 Abríl 2024, Advogadu privadu, Pedro Camões ne’ebé fó asisténsia legál bá arguido António da Conceição ‘Kalohan’, informa  katak iha Kinta, 11 fulan-Abríl 2024, Tribunál Rekursu hasai ona desizaun hodi absolve pena prizaun efetivu tinan-lima (5) bá nia kliente Antonio da Conceição ‘Kalohan’.

Antes ne’e, Sekretáriu Jerál Partidu  Demokrátiku (PD),  António da Conceição “Kalohan”  hato’o agradese ua’in bá ekipa defeza ne’ebé fó asisténsia legal bá kazu ne’ebé nia enfrenta no agradese mós bá Tribunál Rekursu (TR) ne’ebé foti desizaun finál hodi aboselve nia hosi pena prizaun efetivu tinan-lima (5).

Jornalista: Vito Salvadór