Hatutan.com, (12 Abríl 2024), Díli- Konferénsia Episkopál Timorense (CET,  sigla portugés), anúnsiu ofisiálmente bá públiku kona-bá vizita Papa Francisco nian mai Timor-Leste iha loron 09 too  loron 11 fulan-Setembru, tinan ne’e.

Lee Mós: Sarani Katóliku Prepara ho Ksolok Simu Vizita Papa Francisco Mai Timor

Konferénsia Episkopál Timorense (CET, sigla portugés), anúnsiu ofisiálmente bá públiku kona-bá vizita Papa Francisco nian mai Timor-Leste iha loron 09 too loron 11 fulan-Setembru, tinan ne’e. Foto/Elio dos Santos da Costa

Arsebispu Metropolitana Díli, Pró-Prezidente  Konferénsia Episkopál Timorense no kkoordenadór jerál husi ekipa Igreja nian bá Santo Padre nia vizita mai Timor-Leste, Dom Virgílio Kardeál do Carmo da Silva, SDB  hamutuk ho reprezentante Santa Sé iha Timor-Leste, Mgr. Marco Sprizzi,  Sesta kalan (12/04/2024), nakonu ho fuan ksolok no onra boot hakarak fó sai ofisiálmente data hosi vzsita Apostólika Santo Padre Papa Francisco nian mai iha Timor-Leste.

“Santo Padre nia vizita Apostólika iha Timor sei hala’o iha loron 9 to’o loron 11 fulan-Setembru tinan 2024,” Pe. Guilhermino da Silva  pronunsia liuhosi konferensi imprensa iha salaun Prinsipál Kámara Ekleziástika, Lecidere, Dili.

Papa nia vizita Apostólika ida ne’e sei sai eventu istóriku ida bá povu Timor, ne’ebé hein kleur ona prezensa Santo Padre Francisco nian iha rai doben Timor, rai ida ne’ebé nia povu simples sira hatene moris sira nia orijinalidade fiar nian iha Kristu Jesus.

Vizita ofisiál ne’e, planeia antes ona iha tinan 2020, maibé tamba kauza husi Pandemia Covid-19, mak vizita ne’e la konsege realiza. No ohin, sarani hotu nakonu ho sentimentu ksolok nian, agradese bá Sua Santidade nia konfirmasaun atu mai Timor, no atu hatudu sinál gratidaun no domin povu Timor nian bá Santo Padre mak ekipa preparasaun hosi parte Igreja nian servisu maka’as bele hamutuk ho Nunsiatura Apostólika, atu prosesu preparasaun tomak hodi simu Susesór São Pedro no Pastor Universal Kreda nian bele la’o ho di’ak.

“Ita agradese mós ba Estadu Timor nian, bá Presidente da Repúblika, bá Primeiru-Ministru, no ba ekipa tomak hosi parte Governu nian bá preparasaun Santo Padre nia vizita, liu husi kolaborasaun ne’ebé di’ak tebes no esforsu hotu iha preparasaun organizativa no lojístika, atu fasilita sarani tomak bele partisipa no mai hamutuk ho Santo Padre, tan bá sira mak Santo Padre mai, atu hametin liu tan sira-nia fiar no domin ha Kristu Nia Kreda iha Timor-Leste,” Saserdote ne’e tenik.

Lori CET no Nunsiatura Apostólika nia naran, hakarak apela ba maun- alin no bin-feton timoroan hotu, atu kolabora no servisu hamutuk iha tempu preparasaun nian ida ne’e, no liu-liu, buka atu prepara an ho orasaun hodi simu Santo Padre, atu nune’e liu husi vizita ida-ne’e sei sai momentu ida ne’ebé haburas liu tan partisipasaun bá konstrusaun komunidade Kreda no nasaun nian, hodi hamoris fiar no purifika kultura.

Jornalista: Vito Salvadór