Hatutan.com, (11 Abríl 2024), Díli- Prezidente Autoridade Rejiaun Administrativa Espesiál Oé-Cusse (RAEOA), Rogério Tiago Lobato, informa durante prosesu investigasaun bá aviaun ZEESM  nian kona-bá irregularidade sira-ne’e, Aero Díli mak substitui hodi semo bá Oé-Cusse.

Lee Mós: Aviaun Komérsiu Laiha, Aeroportu “Rota do Sândalo” Laiha Retornu

Prezidente Autoridade RAEOA, Rogério Tiago Lobato akompaña hosi Ministru Transporte no Komunikasaun, Miguel Marques Gonçalves Manetelu ho Diretór Aero Dili, Lourenço de Oliveira halo konferénsia imprensa iha Aeroportu Internasionál Prezidente Nicolau Lobato, Díli hodi pronúnsia aviaun Aero Dili substitui operasaun aviaun ZEESM durante aviaun ZEESM iha prosesu investigasaun. Foto/Elio dos Santos da Costa

Prezidente Autoridade RAEOA, Rogério Tiago Sarmento Lobato ne’ebé akompaña hosi Ministru Transporte no Komunikasaun, Miguel Marques Gonçalves Manetelu, Diretór Ezekutivu Aero Díli, Lourenço de Oliveira ho parte Autoridade Nasional Administrasaun Aviasaun Timor-Leste (ANAATL)  liuhosi konferénsia imprensa, Kinta (11/04/2024), informa katak atu solusiona konektividade aéreu nian durante aviaun ZEESM tam iha prosesu investigasaun, maka sei substitui hosi Aero Dili hodi halo operasaun Díi-Oé-Cusse no Oé-Cusse-Díli.

Rogério Tiago Lobato hateten, agora urjente loos mak atu sertifika Aeroportu Rota do Sandalo ne’e para aviaun boot hanesan Aero Dili  bele tun iha ne’ebá no haree katak ekipa tékniku hosi Ministériu Transporte no Komunikasaun liu husi Autoridade Aviasaun Sivíl halo hela servisu no sei bá halo levantamentu iha Aeroportu Rota do Sandalo molok sertifika aeroportu refere.

“Ami seidauk bele fó prazu bá sertifikasaun Aeroportu Rota do Sandalo tanba ne’e sei liuhosi prosesu no prosedimentu ida, tenke kumpre buat sira ne’e hotu, no kuandu prontu ona mak ami marka ona data para aviaun Aero Díli komesa semo ba Oé-Cusse,” Rogério Tiago Sarmento Lobato hateten.

Prezidente Autoridade RAEOA hatutan sei lori tempu uitoan tanba sei halo uluk sertifikasaun bá Aeroportu Rota do Sandalo, maibé sei garante koletividade aéreu  bá Oé-Cusse labele para.

Nia subliña mós katak ekipa tékniku hosi Ministériu Transporte no Komunikasaun liuhosi Autoridade Aviasaun Sivíl sei hamutuk ho ekipa Aero Dili bá halo uluk levantamentu  iha Aeroportu Rota do Sandalo, haree Bombeiru  funsiona ho diak ka lae, seguransa oinsá, no saida-saida mak falta iha ne’ebá autoridade RAEOA tenke disponivel para kompleta fasilidade iha Aeroportu.

N’ain bá empreza Aero iíli, Lourenço de Oliveira hateten, Aero Dili empreza komersiál no atu haree bá volume pasajeiru bá Oé-Cusse ki’ik oan para Aero Dili bá, maibé presiza hatene katak maluk sira iha Oé-Cusse presiza konetividade no presiza ajuda Governu ho tempu ida hanesan ne’e maka Aero Díli deside sei semo ba Oé-Cusse dala-rua  (2) semana-ida (1) iha loron Segunda dadeer no Sesta loraik, no ida ne’e bele fasilita mós investor barak tama Oé-Cusse.

“Bá Aero Díli sei la taka matan no sempre hatutan saida mak falta iha rai-laran, liu-liu iha transporte aéreu, dezde iha fasilidade infraestrutura hanesan iha Oé-Cusse ami sempre prontu atu fasilita Oé-Cusse oan tomak ho transporte aéreu,” Lourenço de Oliveira tenik.

Nia hatutan bá Aero Díli prontu nafatin atu serbí no fasilita transporte aéreu atu garante konetividade aéreu iha Timor-Leste.

Ministru Transporte no Komunikasaun, Miguel Marques Gonçalves Manetelu hateten Aero Dili semo ba Oé-Cusse ne’e se hein prosesu sertifikasaun bá Aeroportu Rota do Sandalo no bainhira sertifika hotu ona mak Aero Dili sei semo bá Oé-Cusse tanba lae populasaun sira liu-liu Oé-Cusse oan sira hanoin katak Sesta agora semo ona.

“Sesta agora Aero Dili seidauk semo tanba sei hein prosesu sertifikasaun bá Aeroportu no ita nia tekniku sira horsehik iha reuniaun no sei kontinua reuniaun tanba atu sertifika Aeroportu ida ho nivel internasionál presiza fasilidade sira ne’ebé fó apoiu ne’e tenke di’ak. Horibainhira ami nia vizita iha Oé-Cusse haree katak presiza kompleta tan fasilidade balun no prontu ona Aero Dili bele semo ona,” Ministru Miguel Marques Gonçalves Manetelu infroma.

Governante ne’e subliña liután katak hodi hein prosesu investigasaun bá aviaun ZEESM, Governu nafatin iha kompromisu atu servisu hamutuk ho empreza aéreu ne’ebé halo operasaun iha Timor-Leste liu-liu hanesan Aero Dili atu bele garante no fasilita transporte aéreu  no hafasil konetividade iha nivel nasionál no internasionál.

Lee Mós: Relatóriu Fulan Rua, Rogério Lobato Detekta Irregularidade iha Jestaun Aviaun ZEESM

Jornalista: Vito Salvadór