Hatutan.com, (09 Abríl 2024), Díli—Ministériu Komérsiu no Industria (MCI, sigla portugés), Kinta (11/04/2024),  sei halo lansamentu ofisial portal informasaun komersiál.

Lee Mós: MCI Lansa Award 2023 bá Micro-Media-Pequena Empreza

Vise-Ministru Komérsiu no Industria, Agusto Junior Trindade hamutuk ho reprezentante Banku Mundiál halo press breafing kona-bá prerparativu lansamentu portal informasaun komersiál ne’ebé sei lansa ofisiál iha loron 11 fulan-Abríl 2024. Foto/Tome da Silva

Vise-Ministru  Komérsiu no Industria, Agusto Junior Trindade hamutuk ho reprezentante Banku Mundiál iha breefing ho órgaun komunikasaun sira iha edifísiu Banku Mundiál, Tersa (09/04/2024), informa iha loron-rua  (2) tuir mai sei iha lansamentu boot ida bá portal informasaun komersiál ka trade information portal.

“Bele hateten katak ita iha servisu koperasaun di’ak entre MCI ho Banku Mundial, lideradu jerente banku mundiál iha Timor-Leste, Bernard Harborne  nune’e, ohin, bele atinji to’o final bá preparasaun lansamentu portal ida-ne’e,”  Vise-Ministru, Agusto Junior Trindade, informa.

Agusto Junior esplika durasaun tempu bá preparativu ne’e han tempu tinan-ida hahú iha loron 09 fulan-Abríl 2023 to’o 2024 no portal informasaun ida-ne’e hanesan ekosistema ida ka envairomentu ida hosi sistema komersiál, oinsá atu tau hamutuk informasaun sira ne’e iha fatin ida, atu kria janela uniku ida ka balkaun úniku ida para informasaun hotu ne’ebé iha relasaun ho komérsiu iha fatin ida deit.

Agusto Junior mós haktuir katak liga ho adezaun Timor-Leste nian bá iha organizasaun mundiál komérsiu (OMK) iha fulan-rua (2) liubá ho nune’e ho lansamentu portal informasaun komérsiu ne’e nu’udár Timor-Leste nia resposta ida bá membru OMK tomak.

Iha portal ne’e mós bele ajuda ema bele asesu lalais liu kompara ho sistema birokrasia ne’e bele gastu tempu tanba klik deit iha website www.tip.mci.gov.tl, iha ne’e ema hotu bele asesu informasaun hotu liga ho komésiu Timor-Leste

Nia fo Ezemplo ema ruma ida rai-liur hanesan Canada nia bele asesu informasaun kona-bá produtu Timor-Leste, liu-liu hanesan kafé, tinan-ida (1) produz tonelada hira, esporta bá nasaun ne’ebé, kafé iha ektare hira,v kompañia hira mak servisu  no seluk tan.

Reprezentante Banku Mundiál iha Timor-Leste, William John Gain hanesan mós espesialista Seniór bá Komersiu, hateten iha okaziaun bá lansamentu bá portal informasaun komersiál hanesan portal ida kritiku tebes bá iha atividade komérsiu iha rai-laran.

Banku Mundiál durante ne’e apoiu ona nasaun barak, atu bele ajuda nasaun nia rejime komérsiu ne’e bele sai kredivel bainhira ema seluk bele asesu informasaun bainhira nia persija.

“Ida ne’e nu’udár momentu kritiku ida bá Timor-Leste nu’udár avansu ida ne’ebe diak bá dezenvolvimentu Timor-Leste nian iha área komérsiu industria,” Nia hateten.

Espera katak hafoin lansamentu bá portal ne’e bele fó benefisiu bá povu Timor-Leste. Nune’e, reprezentante Banku Mundiál Alina Monica Antoci hanesan mós Espesialista Seniór bá Setór Privadu haktuir  tan, portál ne’e reprezenta avansa ida di’ak tebes ne’ebé Governu halo liu-liu MCI halo iha área komérsiu nian.

Iha situ  www.tip.mci.gov.tl ne’e iha mós QR scan code ne’ebé fasilita ema hotu bele asesu liu husi telefone, laptop ka aparelu elektróniku saida deit no iha ne’ebé deit.

Jornalista : Leopoldina de Carvalho