Hatutan.com, (06 Abríl 2024), Díli—Ekipa konjunta halo fiskalizasaun boa Governasaun kompostu hosi Patrimóniu Estadu, Diresaun Nasionál Transporte Terrestre (DNTT), Polísia Tránzitu Munisípiu Díli, Comissão Anti Corrupção (CAC) no Comissão Função Publica (CFP) halo pasa revista no konsege prende  karreta no motór Estadu 30 ne’ebé mak kontinua sirkula iha loron feriadu.

Ekipa konjunta halo pasa revista no konsege prende karreta no motór Estadu 30 ne’ebé mak kontinua sirkula iha loron feriadu, iha Díli. Foto: Lazaro Pereira Quefi.

Transporte ho xapa matrikula G 30 ne’e kompostu hosi karreta Estadu hamutuk 16 no motór Estadu hamutuk 14.

Lee Mós: Patrimóniu Estadu 10 Ne’ebé Prende iha “Fim de Semana”, Utilizadór Sira Kumpre Sansaun Administrativa

Komandante Tránzitu munisípiu Díli, inspetór Afonso da Silva hato’o obrigadu bá Polisia Tranzitu munisipiu Dili bá servisu ohin loron nian maske iha impaktu oioin maibé bele konsege pasa atividade ne’e ho sussesu.

“Ohin buat barak mak ita nia maluk sira halo hasoru ita, maski sira la lori dokumentus karreta no motór nian, laiha autorizasaun maibé iha argumentu oioin. Ita nafatin ho komitmentu sempre prende, agora ita rai iha fatin. Evidénsia ne’ebé mak ita prende maka karreta 16 no motór 14 ho sapa matrikula G. Ida-ne’e ita konsidera hanesan sussesu ida durante oras-rua nia laran,” Inspetór Afonso da Silva hateten iha salaun Patrimoniu Estadu Balide, Saábadu (06/04/2024).

Ekipa konjunta halo pasa revista no konsege prende karreta no motór Estadu 30 ne’ebé mak kontinua sirkula iha loron feriadu, iha Díli. Foto: Lazaro Pereira Quefi.

Durante oras- rua  nia laran konsidera hanesan Swiping tanba ne’e nia dehan, ida ne’ebé mak hetan duni tenke prende hanesan halo auto stop bazeia bá regra Estuda no Governu nian.

Ekipa konjunta hato’o bá públiku katak, atividade ne’e laiha odiu malu, la’ós ego pessoál ruma mak prende malu, maibé atividade ne’e halo tanba regra.

“Iha tempu badak ita halo nafatin ita muda atividade operasaun ne’e bá operasaun seluk. Ha’u husu ba publiku kona-bá atividade ne’e bazeia bá legalidade ne’ebé iha,” Afonso da Silva dehan.

Ekipa konjunta ne’e kompostu hosi Patrimoniu Estadu, Diresaun Nasional Transporte Terestre (DNTT), Polisia Tranzitu Munisipiu Dili, CACA no CFP.

Operasaun konjunta ne’e bazeia bá Dekretu-Lei nú 80/2022 kona-bá regulamentu viatura Estadu, Dekretu-Lei nú 6/2003, 30 Abríl, kona-bá kódigu Estrada, sirkulár númeru 003/GPM/111/2009 kona-bá jestaun tékniku karreta Estadu, sirkulár númeru 001/GPM/X/2012 kona-bá kontrola movimentu viatura Estadu n o padraun prosedimentu operasionál.

Jornalista Estajiáriu:  Lázaro Pereira Quefi