Hatutan.com, (03 Abríl 2024), Díli-Kompañia  nasionál Sali-Magu Lda kontinua fornese ai-moruk hanesan Reagentes Microbiologya, Hematologya & Biochemistry, no produtu medíkamentu bá iha Institutu Nasionál Farmásia no Produtu Médiku (INFPM, sigla portugés).

Lee Mós: Stock Out Ai-Moruk iha INFPM Hela 26% no HNGV 13%

Iha loron 2 fulan-Abríl 2024, FPM simu produtu medikamentu item 13 hosi Sali-Magu Lda. Foto/INFPM

Informasaun  ne’ebe Hatutan.com sita hosi pajína Facebook Instituto Nacional de Farmácia e Produtos Médicos, Timor-Leste  relata, katak Iha loron 18 fulan-Marsu 2024, INFPM simu produtu Reagentes Microbiologya, Hematologya & Biochemistry hosi kompañia Sali-Magu Lda ne’ebé sei utiliza iha Ospitál Nasionál Guido Valadares (HNGV), ospitais referral no Sentru Saúde sira iha territóriu Timor-Leste

Iha loron 23 fulan-Marsu 2024, Sali-Magu kontinua hatama tan  produtu konsumaveis bá Maquina X-ray bá HNGV no ospitál referral sira.

Iha  loron 28 fulan-Marsu 2024, INFPM simu tan produtu  reagentes hosi Sali-Magu Lda. Produtos sira-ne’e sei uza iha Laboratoriu Nasionál (LabNas) HNGV, ospitál referral no sentru saúde sira no simu mós produtu medíkamentu  hamutuk item  ualu (8) ne’ebé sei rai iha Armazen Sentrál INFPM.

Iha loron 02 fulan-Abríl 2024, INFPM  simu produtu medikamentu hamutuk item 13 hosi kompañia Sali-Magu, mak hanesan:

1. Digoxin
2. Vitamin B1 (50mg)
3. Ambroxol
4. Ardium
5. Alovell
6. Xylocaine
7. Ofloxacin
8. Tenace
9. Candesartan
10. Rytmonorm
11. Ranitidine
12. Mannitol
13. Kalmicetine

Liga ho asuntu hirak ne’e  Hatutan.com tenta konfirma ho Ministra Saúde, Élia A.A dos Reis  Amaral, seidauk bele fó komentáriu tanba presiza relatóriu kompletu hosi INFPM.

Hosi sorin seluk dadus ne’ebé Hatutan.com asesu katak daudaun ne’e ai-moruk item sia (9) mak iha ona Aeroportu Internasionál Prezidente Nicolau Lobato ne’ebé empreza Sali-Magu kompras hosi Austrália no iha hela prosesu clearing  ka prosesu selu taxa bá Autoridade Aduaneira ka Alfándega molok hasai hosi Aeroportu hodi lori bá entrega iha INFPM.   

Bá Hatutan.com via telefónika Diretór ka na’in bá empreza  Sali-Magu, Sansaun Gomes mós konfirma, daudaun ne’e produtu konsumovies item 11 mak iha dalan hosi Kupaun-Timor Osidentál  mai Díli ne’ebé transporta ho karreta box rua tama hosi fronteira Batugade, Munisípiu Bobonaro.

Hosi sorin seluk, Prezidente Ekipa Verifikasaun Ministériu Saúde,  Alipio da Costa, informa bá jornalista sira iha edifisiu INFPM iha Kampu Alor, Dílli, Kuarta (03/04/2024), katak ekipa ne’ebé nia lidera halo hela inspesaun bá ai-moruk, konsumovies no reajente ne’ebé fornese hosi Sali-Magu hamutuk item-20.

Inspesaun ka verifikasaun ne’e atu hatene produtu hirak ne’ebé Sali-Magu fonese hamutuk item-20 ne’e nia kualidade.

“Ai-moruk ho item-2o foin tama no ami sei halo verifikasaun molok hand over no halo relatóriu bá Ministra Saúde, Élia A.A dos Reis Amaral,” Alipio da Costa informa.

Jornalista: Leopoldina de Carvalho