Hatutan.com, (05 Marsu 2024), Díli—Parlamentu Nasionál (PN) liu hosi deputada Cedeliza Faria dos Santos preokupa ho komunidade balun iha munisípiu Díli ne’ebé kontinua sosa Bee-moos.

Komunidade Lori jerigen tula iha karrosa ba buka bee-moos iha área Tasi Tolu, Díli, 2021. EPA-EFE/ANTÓNIO DASIPARU

“Komunidade iha Taibesi no Kuluhun fulan tolu ona la assesu bee-moos no sira sosa de’it. Balun ne’ebé iha osan sira sosa rasik no balun ne’ebé laiha osan sira tenke lalin masa bá mai buka bee moos hodi kuru,” deputada Cedeliza Faria dos Santos hateten iha nia intervensaun plenária, Tersa (05/03/2024).

Lee Mós: Empréstimu Millaun $121 ba Fornesimentu Bee Moos iha Díli Sei Implementa iha Outubru

Tanbá ne’e nia husu bá BTL,E.P atu rezolve problema ida-ne’e tanba tuir informasaun ne’ebé komunidade sira informa katak BTL,E.P rasik maka bá sobu tiha kanalizasaun balun iha komunidade nia uma.

Situasaun ne’e to’o agora seidauk hadi’a, entaun fó impaktu bá komunidade nune’e husu bá Vise-Ministru Asuntu Parlamentár atu hato’o hela preokupasaun ne’e bá Ministériu kompetente atu rezolve lalais no labele husik komunidade hele bebeik ho situasaun ne’e.

Deputadu bankada FRETILIN António Calau reforsa tán katak, Díli presiza tebes atensaun liuliu kona-bá bee-moos no bankada FRETILIN desde inísiu preokupa kedan tanba ne’e husu bá Vise-Ministru Asuntu Parlamentár atu fó atensaun bá assuntu ida-ne’e.

“Bá longu prazu ami la ezije maibé bá kurtu prazu oinsá atu prevene ita nia sidadaun sira iha munisípiu Díli labele sosa bee. Governu iha atu responde sira nia nesesidade,” Antonio Calau hateten.

Kona-bá preokupasaun ne’e, Vise-Ministru Asuntu Parlamentár, Áderito da Costa Hugo hateten, distribuisaun bee-moos ne’ebé deputadu sira foti, lakohi fó kulpa bá ema ruma tanba jestór operasionál BTL, E.P sei nafatin rekursu mai hosi Governu anteriór nian.

“Katak sira prontu lidera BTL, E.P hodi nafatin sai jestór. Tanba ne’e maka IX Governu kontinua nafatin indika sira mak halo jestaun bá BTL, E.P hodi buka solusaun bá problema sira ne’e,” Adérito da Costa Hugo hateten.

Jornalista Estajiária: Zita Menezes