Hatutan.com, (20 Fevereiru 2024), Díli-Ministériu Públiku (MP) liuhosi Prokuradór Domingos Barreto, promove kríme rua; Ofensas Integridade Fízika no Omesídiu ho Forma Atentadu, hasoru Arguidu AM tanba deskonfia ho pistola tiru kanek vítima Abrão dos Reis Smith, iha área Taibessi-Likintae, Suku Lahane Orientál, Postu Administrativu Verra Cruz, Munisípiu Díli, Domingu madrugada, 18 fulan-Fevereiru 2024.

Lee Mós: Kazu Tiru iha Likintae, Suspeitu AM Submete Bá Primeiru Interrogatóriu Judisiál

Arguidu AM ne’ebé tiru membru F-FDTL iha Likintae, Díli, Domingu madrugada (18/02/2024). Foto/Tome da Silva

“Agora ita aplika ona TIR no arguidu ita promove ho krime rua; ida, Ofensas Integridade Fízika, iha Lei Kódigu Penal Artigu 145, no kríme ida tán maka, Omesídiu no Forma Atentadu iha Artigu 138 konjuga ho Artigu 23 no 24, hosi lei kódigu prosesu penál,” Prokuradór Domingos Barreto, hatán bá Hatutan.com durante akompaña prosesu Primeiru Interrogatóriu Judisial hasoru arguidu AM iha Tribunál Judisial Primeira Instásia Dili (TJPID), Tersa (20/02/2024).

Hafoin Prosesu Primeiru Interrogatóriu Judisial, parte Defeza lakohi fó komentáriu no hatete de’it katak, desizaun adia bá Kuarta aban (21/02/2024), tuku 09:00 Otl. Maske nune’e, MP husu Tribunál atu aplika medida koasaun preventiva, tanba haree katak, saida mak konfesa iha prosesu primeiru interróriu ne’e, Arguidu AM tenta halai sees hosi faktu ‘konkreta’ sira ne’ebé mak iha.

Hafoin rona tiha parte hotu, Tribunál liuhosi Juiz Singulár José Maria, adia julagmentu bá Kuarta aban, 21 fulan-Fevereiru 2024,  hale’u tuku 09:00 Otl. Audiénsia Primeiru Interrogatóriu ne’e prezide hosi Juiz Singular José Maria, Ministériu Públiku (MP), reprezenta hosi Prokuradór Domingos Barreto, no Arguidu hetan asisténsia legál hosi Advogadu Privádu Câncio Freitas.

Lee Mós: Kronolojia Versaun Polísia Kona-bá Kazu Tiru iha Likintae

Jornalista: Rogério Pereira Cárceres