Hatutan.com, (17 Fevereiru 2024), Díli-Sekretária Estadu Protesaun Sívil (SEPS) liuhosi Autoridade Protesaun Sívil (APC-sigla portugés) hamutuk ho ekipa Bombeiru, Sesta (16/02/2024), hale’u tuku 16:00 Otl, evakua família afetadu indunsaun hamutuk uma-kain 22 bá sentru evakuasaun Caicoli, Díli.

Lee Mós: Inundasaun iha Díli, APC Assegura Vítima 100-resin

SEPS asegura vítima inundasaun sira iha sentru evakuasaun Caicoli, Díli, Sesta (16/02/2024). Foto/SEPS

Udan-boot ne’ebé akontese iha Sesta lokraik, hosi tuku 15:00 Otl to’o fali  tuku 20:00 Otl, rezulta bee iha mota parte Maufelu-Becora nian no Bidau sa’e tama to’o komunidade nia horik fatin.  

La’ós ne’e de’it, uma balu hetan  estragu iha área Caicoli, no uma rua mak bee sae iha área Becora, besik Eskola Sekundária Tékniku Vokasional (ESTV) ka STM nia sorin. Enkuantu uma rua seluk, bee sa’e iha área Taibessi.

Tuir observasaun Hatutan.com nian, Sábadu (17/02/2024), tuku 09:30  Otl, iha Sentru Evakuasaun APC, Caicoli, vítima sira  fila-fali ona bá sira nia hela fatin, hafoin hetan asisténsia hosi ekipa Protesaun Sívil sira.

Asisténsia sira ne’ebé ekipa APC fó iha sentru evakusaun mak, hahan tasak. Bá hirak ne’ebé ninia uma bee tama, maibé lakohi sai, no hakarak hela nafatin iha sira ninian uma, sira mós nafatin iha dereitu hodi hetan apoiu emerjénsia (hahan no la’os ai-han).

Ekipa APC nian halo mós levantamentu dadus bá uma hirak mak bee sobu ka bee tama, plantasaun saida de’it mak estragu, pontes, estradas.

Bainhira dadus kona-bá estragu sira ne’e rejistadu, ekipa APC mós presija haree bá kategoria hosi estragu sira, entre aat kaman, aat natoon, no aat totál. Iha prosesu identifikasaun no rekollamentu dadus hirak ne’e, ekipa APC sempre konjunta ho autoridade lokál no komunitária sira.

Dadaun ne’e ekipa tékniku sira tun ona bá fatin inundasaun hodi verifika no identifika kondisaun uma no sasan sira ne’ebé mak estragu.

Tuir Standart Operational Prosedure (SOP) bainhira ekipa APC evakua ona vítima sira bá iha sentru evakuasaun, APC iha mós prazu tempu atu re-integra família vitima sira ka kontinua mantein iha fatin seguru. Nune’e, sura hosi oras evakuasaun to’o oras ualu (8), oras 12, 24, 48 no bele to’o oras 72.

Bainhira vítima sira nafatin hela iha sentru evakuasaun, signifika tama ona iha situasaun ida ne’ebé gráve, tanba vítima sira ninia uma estragu totál.

Kona-bá atendimentu nian, APC sempre la’o tuir ninia eskala. Primeira Eskala, ne’e tama iha ekipa APC sira nia responsábilidade mesak. Segunda Eskala, APC envolve ona ho parseiru sira no liñas ministeriál.

Bainhira tama ona iha Terseira Eskala, signifika, situasaun tama ona iha kalamidade no ida-ne’e atendimentu tenke envolve ona mós parseiru internasional sira.

Jornalista: Rogério Pereira Cárceres