Hatutan.com, (26 Janeiru 2024), Jakarta-Primeiru-Ministru (PM), Xanana Gusmão ho Prezidente Repúblika Indonézia, Joko Widodo, seidauk asina akordu delimitasaun frointeira terrestre Timor-Leste ho Indonézia tanba seidauk iha konsensu.

Lee Mós: Xanana Iha Ona Jakarta, Laiha Ajenda Asinatura Akordu Fronteira Terrestre

PM Xanana Gusmão halo konférensia imprensa hodi esplika kona-bá pozisaun Timor-Leste nian kona-bá negosiasaun fronteira terrestre ho Indonézia. Foto/Rogério Pereira Cárceres

Jornalista Hatutan.com, Rogério Pereira Cárceres, ne’ebé akompaña vizita ofisial PM Xanana nian hosi Jakarta, Sesta (26/01/2024), informa katak Indonesia ho Timor-Leste seidauk iha akordu kona-bá fronteira terrestre ne’ebé definitivu, tanba  Primeiru-Ministru  Xanana Gusmão, hakarak akordu hotu kona-bá delimitasaun fronteira terrestre nian tenke benefísia  povu Timor-Leste ho povu Indonézia ne’ebé hela iha liña fronteira.

“Imi mós kala hanoin dehan, kona-bá fronteira, dehan atu mai asina, nusá mak la asina? Sim, ita atu dehan karik, dehan, ita hakarak buat ne’e bele lalais. Mas, ita la’ós ansi, ne’ebé, ita taka matan bá de’it. Ne’ebé, buat ne’e lori tempu,”  PM Xanana hateten bá jornalista sira liuhosi konferénsia imprénsa iha Otel Kempinski, Jakarta-Indonézia.

“Imi haree de’it katak, Indonézia ho Malázia ne’e mós iha fatin balu iha leten ne’ebá de’it, seidauk tán. Ne’ebé, ita hakarak lalais, mais, hanesan ne’e duni, kuandu buat ida dehan ita to’o akordu ne’e, iha buat hothotu ita konkorda malu ona mak ita foin asina. Ne’ebé, buat ne’e hanesan asuntu ne’ebé prezidente Jokowi mós ohin dehan, no haree, sei iha futuru proximu, katak, sé bele karik, lalika kleur demais bá, ita haree took ita asina tiha de’it,” Xanana esklarese.

PM Xanana esplika, ohin la asina ne’e, la’os dehan katak, Timor taka ona dalan bá buat sira ne’e hotu, mas tenke hatudu katak, Timor-Leste mós iha ninian prinsípius, Indonézia mós iha nia prinsípius.

“Ita respeita malu prinsípius sira ne’e no bainhira ita asina buat ruma, dokumentu sira, buat ne’e parte hotu, ha’u la dehan bele manán, mais, bele benefísia hosi ne’e,”  Xanana tenik.

 Hatán bá espekulasaun iha públiku kona-bá polémika iha rai-ketan Naktuka, Oé-Cusse ne’ebé ekipa rua, Gabinete Fronteira Marítima Timor-Leste no Indonézia bá tau estaka ka piláres hamutuk 79, deskonfia tama liu bá populasaun Oé-Cusse sira nia rai, PM Xanana hatán dehan, “Ne’e ha’u la ko’alia. Ha’u la ko’alia! Ó bá iha ne’ebá, ó bá husu populasaun, sé ha’u bá iha ne’ebá ka lae. Ha’u la hasai desizaun, sein koñese Oé-Cusse. Ha’u bá iha ne’ebá, ita-boot seidauk jornalista tán.”  ***