Hatutan.com, (17 Janeiru 2024), Díli-Embaixadóra Timor-Leste Missaun iha Zenebra, Lurdes Bessa, konsidera katak, prezensa Primeiru-Ministru, Kay Rala Xanana Gusmão ho delegasaun iha forum ekonómiku mundial dala-54, ne’ebé hala’o iha Davos-Klosters, Suiça, importante atu hametin kooperasaun ho parseiru sira.

PM Xanana ho delegasaun to’o ona iha Suiça. Foto/Mídia GPM

Haktuir bá komunikadu imprensa ne’ebé Hatutan.com asesu Kuarta (17/01/2024), hosi Gabinete Primeiru Ministru, relata katak, PM Xanana ho delegasaun sira to’o tiha ona iha Suiça, Tersa horiseik, hodi prepara partisipa iha Forum Ekonómiku Mundiál (World Economic Forum) bá dala-54 iha Davos-Klosters.

Xefe Governu ho delegasaun hala’o viazen hosi Bali liu bá Dubai to’o Aeroportu Internasionál Suiça iha 70:30 dadersan.

Primeiru-Ministru Xanana ho delegasaun simu direta hosi Embaixadóra Timor-Leste Misaun iha Zenebra, Lurdes Bessa no ekipa protokolu hodi kontinua kedas viájen bá  Otél Valbella Resort ne’ebé dook malu ho área ka fatin enkontru Davos-Klosters  kilometru 40 ho tempu viájen oras ida.

To’o iha Otél, PM Xanana kontinua realiza kedas reuniaun badak Embaixadóra Lurdes Bessa hodi atualiza ajenda enkontru Forum Ekonómiku Mundiál.

“Embaixadóra Timor-Leste Misaun iha Zenebra, Lurdes Bessa agradese tebes bá vizita PM Xanana nian importante hodi hametin kooperasaun Timor-Leste ho parseiru sira iha membru Forum Ekonómiku Mundiál,” Hatutan.com sita komunikadu imprensa ne’e.

PM Xanana akompaña hosi Embaixadóra Lurdes Bessa, hala’o mós reuniaun kortezia ho Konsul Onoráriu Timor-Leste bá Alemaña, Uta Lena Lenzen hodi atualiza programa servisu sira kona-bá progresu kooperasaun servisu ne’ebé rai rua estabelese durante ne’e no haree kontinua programa ne’ebé sei hala’o entre rai rua iha tinan ne’e bá oin.

Iha enkontru Konsul Onoráriu Timor-Leste bá Alemaña, Uta Lena Lenzen indrodus konvite hosi Governu Alemaña atu konvida xefe governu hala’o vizita ofisiál bá Alemaña iha tinan ne’e nia laran.

Asuntu seluk tán maka, Konsuladu Uta Lena Lenzen introdus bá xefe governu kona-bá nia parte atu lori intelektuál na’in-lima ne’ebé koñesidu iha Europa no simu ona Prémiu Novel oin-oin atu hala’o sira-nian vizita mai Timor-Leste no hala’o enkontru no entidade, sosiedade no estudante universitáriu sira inklui vizita munisipiu balun iha Timor-Leste.

Ajenda bá programa ne’e rasik, Konsuladu Uta Lena Lenzen aprezenta mós bá Primeiru-Ministru, Xanana Gusmão, durante ninia vizita ba Timor-Leste.

Iha parte lorokraik, Xefe Governu Xanana akompaña hosi Embaixadora, Lurdes Bessa, partisipa jantar amizade no benvindu hosi Klaus no Hilde Schwab hamutuk ho xefe estadus, xefe governu, organizasaun internasional, no membru Forum Ekonómiku Mundiál sira.

Tuir agenda iha Kuarta, 17 fulan-Janeiru 2023 dader to’o lokraik, PM Xanana no xefe Governu no xefe estadu ASEAN nian balun sei partisipa abertura Forum Ekonómiku Mundiál iha sidade Davos-Klosters ne’ebé ho kondisaun iklima malirin ho jeilu.

Xefe Governu Xanana sei hato’o mós palestra bá parseiru sira liga ho temátika haat ne’ebé deside ona mak hanesan, (1) Alkansa seguransa no kooperasaun iha mundu ida ne’ebé laiha unidade, (2) Intelijénsia artifisiál nu’udár forsa prinsipál bá dezenvolvimentu ekonomia no sosiedade, (3) Kria kresimentu no empregu iha era foun no, (4) Estratejia longu prazu bá klimátika, natureza ho enérjia.

Tuir ajenda, Forum Ekonómiku Mundiál ne’e sei partisipa direta hosi lider mundiál sira hanesan, Sekretáriu Jerál Nasoes Unidas (ONU), António Guterres,  Primeiru-Ministru Kambodia, Hum Manet, Prezidente Repúblika Singapura, Tharman Shanmugaratnam, Prezidente World Bank Group, Ajay S Banga,  Primeiru-Ministru Bulgaria, Nikolai Denkov, Diretór Jerál WHO, Tedros Ghebreyesus no bainaka importante sira seluk ne’ebé sei hato’o hanoin di’ak sira atu bele serbisu hamutuk iha prioridade temátika haat ne’ebé sei deskute durante forum iha Davos-Klosters.

Jornalista: Rogério Pereira Cárceres