Hatutan.com, (15 Janeiru 2024), Díli—Sekretária Estadu Protesaun Sivíl (SEPS), liuhosi Autoridade Protesaun Sivíl (APC-Sigla Portugés), rejísta komunidade nia uma hamutuk 410 mak hetan estragus hosi inundasaun iha territóriu nasionál, inklui hamate ema na’in-rua no ema na’in-ualu kanek.

Xefe Gabinete Relasaun Esterna no Komunikasaun (GREC-Sigla Português), Cesário da Silva Marques. Foto: Elio dos Santos da Costa.

Xefe Gabinete Relasaun Esterna no Komunikasaun (GREC-Sigla Portugés), Cesário da Silva Marques atualiza dadus bá semana ida nian hosi loron 09 to’o loron 15 fulan-janeiru 2024,  rejísta uma komunidade nian hamutuk 432 mak hetan estragu iha munisipiu 11.

Lee Mós: Membru UEP Na’in-66 Dezloka Bá Munisípiu Sia Tulun Vítima Dezastre Naturál

Iha Munisipiu Ainaro, uma ida hetan estragu hosi bee-sa’e, ema na’in-8 kanek no ema ida lakon vida. Iha Ataúro anin sobu uma-ida, Bobonaro anin sobu uma-hitu, Covalima anin sobu uma-ida, bee tama uma haat.

Dili, ahi-han uma ida, bee tama uma 386, Ermera anin sobu uma ida, uma rua bee tama, ema ida lakon vida tanba mota lori, Liquiça anin sobu uma-haat, inundasaun estraga uma-17, Manatuto anin sobu uma ida, Manufahi anin sobu uma-ida.

Iha Rejiaun Administrativa Espesiál Oecusse Ambeno (RAEOA), ahi han uma-ida no iha Munisipiu Viquque anin sobu uma haat, halo vítima sira tenke evakua bá fatin seguru ne’ebé autoridade APC ho autoridade sira munisipiu nian prepara.

Inundasaun ne’ebé akontese iha Tersa (09/01/2024), estraga komunidade nia uma iha Dili. Foto: Elio dos Santos da Costa.

“Durante semana ida-ne’e, inundasaun mak dadus ne’ebé aas oitoan, hamutuk 410. Tuir fali maka anin sobu no halo estragus bá uma 20, ahi han uma rua, ema na’in-ualu mak kanek no ema na’in-rua mak lakon vida,” Portavós APC, Cesário da Silva Marques fó sai liuhosi konferénsia imprénsa iha knaar fatin APC, Caicoli, Dili, Segunda (15/01/2024).

Kona-bá apoiu bá vítima sira, presiza haree mós bá iha tipu estragu nian. Estragu kamaan, natoon, no estragu totál.

Bainhira verifika tiha dadus hotu, hafoin ekipa APC sei fó apoiu ho tipu rua, emerjénsia no rekoperasaun.

Apoiu emerjénsia ne’e mak fó apoiu sasán bázika sira mak hanesan, fós, mina, supermie, balde, sabaun, rinso. Apoiu rekuperasaun nian maka, distribui kaleen, ai, besi, semente ho prégu.

“Bá apoiu emerjénsia munisipiu 10, komandu autoridade protesaun sívil ho parseiru sira fó ona apoiu emerjénsia bá iha vítima sira. Iha Munisipiu Dili, APC seidauk fó apoiu emerjénsia, tanba ekipa sira sei haree hamutuk hela bá dadus finál, hodi fó resposta bá vítima inundasaun sira ne’ebé mak akontese iha Dili, vítima sira hamutuk 386,” nia informa.

Dadaun ne’e SEPS-APC liuhosi diresaun nasionál Bombeiro iha kada munisipiu, hala’o hela servisu iha terrenu mak hanesan, tesi ai ne’ebé monu taka estrada públiku no ameasa komunidade nia uma.

Iha Dili, korpu bombeiru sira lori bee rega no fase mós bá komunidade sira nia uma ne’ebé mak afetadu hosi inundasaun. Alende ne’e, kontinua hamoos estraga públiku sira.

Jornalista: Rogério Pereira Cárceres