Hatutan.com, (13 Janeiru 2024), Díli—Posibilidade Papa Francisco sei hala’o vizita bá nasaun haat iha Ázia mak hanesan Indonézia, Singapura, Timor-Leste (TL) no mós Papua Nova Giné iha fim fulan Agostu tinan ne’e.

Xanana Gusmão Hasoru Papa Francisco iha Palásiu Apostóliku Santa Sé, Roma, iha loron 25 fulan-Agostu 2022. Foto/Media PR

Radio Veritas Asia (RVA) sita publikasaun revista mensál Katólika Jesuita Estadus Unidus Amérika, katak, Papa Francisco iha ona planu antes atu hala’o vizita bá Azia iha tinan 2020. Maibé, pandemia COVID-19 mak halo impedimentu bá ajenda vizita ne’e.

Lee Mós: Natal Iha Vatikanu, Papa Francisco Haklaken Dame bá Mundu

“Timor-Leste iha ninia populasaun ne’ebé fiar bá Relijiaun Katólika barak liu iha Azia kuaze 97% hosi populasaun millaun 1,4,” Hatutan.com sita publikasaun RVA (10/01/2024).

Kontráriu ho Papua Nova Giné ne’ebé ninia populasaun millaun 10, maibé 26% de’it mak fiar bá Relijiaun Katólika. Papa Francisco hakarak tebes atu vizita nasaun kiik rua ne’e kleur ona.

Nune’e mós Indonézia ne’ebé hanesan nasaun ho maioria populasaun moris ho fiar Muslumana boot liu kompara ho nasaun hotu-hotu iha mundu. Singapura mós husu ona bá Vatikanu atu hetan vizita hosi Papa Francisco.

Iha mós posibilidade kiik liu, Papa Francisco hakarak atu vizita nasaun Vietname iha tinan ida ne’e.

Xanana Gusmão Hasoru Papa Francisco iha Palásiu Apostóliku Santa Sé, Roma, iha loron 25 fulan-Agostu 2022. Foto/Media PR

Governu Vietname hakarak atu Estadu Vatikanu loke ninia reprezentante permanente iha nasaun ne’e desde tinan kotuk. Pedidu ne’e hanesan pedidu bá dala uluk liu desde funu Vietmane remata.

Iha fulan Jullu tinan kotuk, Prezidente Vietname hasoru malu ho Papa Francisco no iha fulan Dezembru, Prezidente ne’e deklara katak nia haruka ona karta ofisiál bá Papa Francisco ne’ebé ho konteúdu husu atu Papa halo vizita bá nasaun ne’e.

Maski nune’e, Papa Francisco hakarak atu hala’o vizita bá Vietname depois de ofisialmente estabelese relasaun diplomatiku.

Alende nasaun sira iha Azia, Papa Francisco iha mós planu atu hala’o vizita bá nasaun Béljika no Argentina iha tinan ida-ne’e.

Prezidente Fransa, Emmanuel Macron mós ofisialmente husu ona bá Papa Francisco atu hala’o vizita bá Paris hodi partisipa iha re-abertura Katedral Notre-Dame ne’ebé koñesidu iha 8 Dezembru 2024, maski Papa Francisco seidauk fó sai ninia planu rasik.

Lee Mós: Mensajen-Bensaun Papa Francisco Bá Sarani-Povu TL no Vizita Ad Limina

Iha publikasaun RVA mós sita katak, Papa Francisco vizita ona nasaun 61 iha ninia viazen Papál hamutuk dala 44 fora hosi Italia desde eleitu iha tinan 2013.*