Hatutan.com, (08 Janeiru 2024), Díli– Vise-Ministru asuntu Parlamentár, Adérito da Costa Hugo informa, posibilidade bele mosu kandidatu foun bá Komisáriu  Komisaun Anti Korrupsaun (CAC, sigla portugés).

Lee Mós: Susar Tebes CAC Hala’o Funsaun ho Di’ak

Edifísiu CAC iha Farol, Díli. Foto/Dok.CAC

Dezde tinan kotuk, 2023, Parlamentu Nasionál la halo konsensu atu hili kandidatu komisáriu CAC na’in-rua (2) ne’ebé Konsellu Ministru (KM) submete bá PN. Sira na’in-rua ne’e mak; Sergio Hornai ho Rui Pereira.

“Kona-bá Komisáriu CAC nian, imi hotu hatene no akompaña dezde 2023 ambiente lobby sira nian iha Parlamentu Nasionál no ami to’o iha pontu finál ida katak Governu tenke foti fali konsiderasaun foun ida katak depois para halo fali segundu dia korrespondénsia mai Parlamentu depois halo andamentu para ita bele iha ona komisáriu CAC nian iha inísiu tinan ida-ne’e,” Vise-Ministru asuntu Parlamentár, Adérito da Costa Hugo bá Jornalista sira iha PN Segunda (08/01/2024).

Hafoin feriadu Natal ho Ano Novo nian,  IX Governu seidauk konsege halo Reuniaun Konsellu Ministru semana dahuluk fulan-Janeiru nian. Nune’e bainhira iha Konsellu Ministru, Vise-Ministru asuntu Parlamentár, Adérito Hugo da Costa, sei halo aprezentasaun bá pontu situasaun lista komisáriu CAC nian ne’ebé maka submete mai tinan kotuk ne’ebé Parlamentu la konsege halo votasaun

“Konsellu Ministru bele foti fali desizaun para halo aprezenta fali ho via seluk ne’ebé  mai ho desizaun saida de’it kandidatu úniku ka ho kandidatu pena ne’e deliberasaun Konsellu Ministru maka bele haree,” Adérito Hugo hateten.

“Bele mós mosu foun no bele mós mosu kandidatu úniku, ami sei rona leitura bá dinámika diskusaun  lobby ne’ebé maka ami rona ona pozisaun bankada sira hotu entre kandidatu rua ne’e  meius saida maka bele aprezenta, mai rua nafatin ho kompozisaun naran muda ka mai nafatin ho naran rua ne’e kompeténsia Konsellu Ministru nian,” Adérito Hugo hateten.

Jornalista Estajiária: Zita Menezes