Hatutan.com, (27 Dezembru 2023), Díli-Polísia Nasionál Timor-Leste (PNTL) Munisípiu Bobonaro, kaptura ona autór mane ida ho inisial JV ne’ebé mak hamutuk ho nia maluk na’in-haat seluk halo asalta bá avó feto ida no bei-oan mane na’in-rua ho motór iha Aldeia Cossal, Suku Saburai, Postu Administrativu Bobonaro, Munisipíu Bobonaro.

Kazu asaltu taka oin metin atu hanesan ninja ne’e akontese iha Segunda, 25 fulan-Dezembru 2023, tuku 14:05 Otl no hosi akontesimentu ida-ne’e iha mós ema deskoñesidu balu ne’ebé mak halo gravasaun video to’o viral iha média sosiál Facebook.

Xefe Departamentu Investigasaun Kriminal Nasional, Superintendente Polísia Joăo Belo dos Reis. Foto/Tome da Silva

Iha gravasaun video ne’e, hatudu avó feto ida ho ninia bei-oan mane na’in-rua  sa’e hamutuk hela iha motór ida to’o iha dalan klaran, mosu grupu deskoñesidu ida kompostu hosi joven mane na’in-rua, uza faru taka oin metin atu hanesan ninja, hamriik taka hela iha estrada klaran.

Hosi grupu ninja sira ne’e, iha ida mak tuku dala-rua iha labarik mane ne’ebé kondús  motór ne’e nia oin, ida seluk mak tebe motór  monu to’o hanehan tán avó ne’e ho ninia bei-oan na’in-rua.

“Kona-bá ema asalta labarik ho motór, ho ninia avó ida iha Saburai ne’ebá katak, autór na’in-lima (5) ne’ebé envolve iha kazu ne’e, ida, polisia kaer ona,” Xefe Departamentu Investigasaun Kriminal Nasional, Superintendente Polísia Joăo Belo dos Reis, informa bá jornalista sira liuhosi konferénsia imprénsa, Kuarta (27/12/2023).

Nia hatutan,  na’in-haat (4) seluk komandu PNTL Munisípiu Bobonaro, servisu hamutuk hela ho xefe aldeia, xefe suku no mós juventude sei buka nafatin no husu sira nian inan-aman, atu entrega sira bá polísia iha tempu badak nia laran.

Prosesu investigasaun bá autór JV, oras ne’e la’o hela, investigadór sira halibur nafatin hela dadus hosi suspeitu, nune’e bele deskobre no hatene kona-bá kronolójia hosi kazu ne’e rasik.

Komandante João Belo, konsidera katak, asaun ne’ebé autór sira halo ne’e ilegál, kriminál, no ema sira ne’ebé mak halo, ne’e konsidera kriminóju. Tanba ne’e, PNTL alerta bá ema hotu, asaun sira hanesan ne’e, labele repete.

“Iha ne’ebé de’it, polisia la autoriza, polísia laiha toleránsia bá sira hanesan ne’e. Ne’e asaun ne’e labele repete iha Timor-Leste, tanba ema hothotu, sidadaun hothotu, iha liberdade atu halo movimentu iha tempu kalan nomós loron,” nia hateten.

Kazu Cailaco Kaptura Suspeitu Na’in-rua

Komandante João Belo Reis, informa mós kazu insidente asalta malu iha Postu Administrativu Cailaco, Munisípiu Bobonaro, Domingu (24/12/2023), haleu tuku 23:00 kalan Otl, uainhira sarani sira sai hosi missa.

“Segundu, nafatin iha Bobonaro, iha relasaun ho kazu Cailaco nian, asalta malu iha kampu laran, ne’ebé mós virál, polísia kaer ona suspeitu na’in-rua. Ne’ebé, na’in-rua mak agora iha sela polisia. No hosi na’in-rua ne’ebé mak polisia kaer, polisia sei buka tán autór seluk ne’ebé mak partisipa iha asaun ida ne’e,” João Belo informa.

Kazu ne’e akontese entre joven sira, iha ligasaun ho ódiu malu pesoal, maibé, tuir informasaun inisial hosi polísia, deskonfia kazu ne’e namkait oitoan ho membru Grupu Artes Marsiál sira nian. Tanba ne’e, polísia sei halibur hela informasaun, karik dadus kompletu ona, loron ida, sei informa fali bá públiku.

Jornalista: Rogério Pereira Cárceres