Hatutan.com, (23 Dezembru 2023), Díli—Assosiasaun Futeból no Assosiasaun profisionál sira ne’ebé asosia bá Federasaun Futeból Timor-Leste (FFTL) hamutuk 13, ofisialmente deklara sira nia apoiu bá kandidatu Francisco Kalbuadi Lay atu assume kargu Prezidente FFTL iha períudu 2022-2026.

Assosiasaun Futeból no Assosiasaun profisionál sira ne’ebé asosia bá Federasaun Futeból Timor-Leste (FFTL) hamutuk 13, ofisialmente deklara sira nia apoiu bá kandidatu Francisco Kalbuadi Lay atu assume kargu Prezidente FFTL iha períudu 2022-2026, liu hosi konferénsia imprensa ne’ebé hala’o iha Otél Luz Clarita, Sábadu (23/12/2023). Foto: Vito Salvadór.

Prezidente Asosiasaun Futeból Díli Oeste, Ipolito Soares hateten, assosiasaun hamutuk 13 mak husu duni bá Francisco Kalbuadi Lay nia disponibilidade hodi kandidata nia bá Prezidente FFTL.

Lee Mós: Komité Eleitorál FFTL Deklara Laiha Reklamasaun bá Kandidatu Kalbuadi-Nilton Gusmão

Assosiasaun 13 ne’e konsidera Francisco Kalbuadi Lay la’ós ema foun bá futeból iha Timor-Leste (TL) no nia merese atu fila hikas bá FFTL hodi dezenvolve Futeból iha Timor-Leste bá oin.

“Ita-nia futeból iha Timor-Leste hakdasak hela, tanba ne’e se ita hakarak hadi’a ita presiza ema ida ne’ebé iha esperiénsia no ami hamutuk hanoin katak di’ak liu maka depózita hikas konfiansa bá Francisco Kalbuadi Lay,” Ipolito Soares hateten liu hosi konferénsia imprensa ne’ebé hala’o iha Otél Luz Clarita, Sábdu (23/12/2023).

Tuir observasaun hosi assosiasaun hirak ne’e katak, Francisco Kalbuadi Lay hatudu ona nia kontribuisaun bá Futeból iha Timor-Leste liu hosi lori FFTL adere bá organizasaun Futeból mundiál (FIFA) no ida-ne’e hanesan obra extraordináriu la’ós ne’e de’it maibé Francisco Kalbuadi Lay kontribui mós bá dezenvolvimentu Futeból liu hosi infraestrutura bázika bá edifísiu FFTL no kampu treinamentu ne’ebé to’o ohin loron selesaun nasionál utiliza.

Nune’e mós Prezidente Asosiasaun Futeból Díli Leste, Aleixo Cobra hateten, ko’alia kona-bá Futeból laiha ema ida iha Timor-Leste ne’ebé bele haluhan Francisco Kalbuadi Lay nia kontribuisaun.

Assosiasaun Futeból no Assosiasaun profisionál sira ne’ebé asosia bá Federasaun Futeból Timor-Leste (FFTL) hamutuk 13, ofisialmente deklara sira nia apoiu bá kandidatu Francisco Kalbuadi Lay atu assume kargu Prezidente FFTL iha períudu 2022-2026, liu hosi karta deklarasaun konjunta.

“Ha’u ko’alia frankamente tanba Indonézia de’it ukun an liu ona tinan 60-resin maibé la lori Prezidente FIFA bá sira nia nasaun, maibé Timor-Leste liu hosi Francisco Kalbuadi Lay nia lideransa lori Prezidente FIFA Joseph Blatter mai Timor-Leste,” Aleixo Cobra hateten.

Aleixo Cobra hatutan, assosiasaun membru FFTL nian hamutuk 13 ne’ebé husu atu Francisco Kalbuadi Lay kandidata nia an bá Prezidente ezekutivu FFTL tanba hakarak atu iha kontinuasaun bá programa sira ne’ebé iha hodi lori Futeból iha Timor-Leste bá oin.

Aleixo Cobra mós lakohi ko’alia kandidatu seluk nia frakeza tanba hakarak hotu-hotu hamutuk kontribui bá dezenvolvimentu Futeból iha Timor-Leste.

“Ami prontu servisu iha Francisco Kalbuadi Lay nia lideransa no ami presiza nia figura atu bele halo loby internasionál hodi aumenta kapasitasaun rekursu umanu ba jogadór, árbitru no treinadór hodi lori Futeból iha Timor-Leste bá oin di’ak liután,” nia subliña.

Ezije Gregório Correia Demite An Hosi kargu Sekretáriu Jerál FFTL Atuál

Assosiasaun Futeból no Assosiasaun profisionál sira ne’ebé assosia b’a Federasaun Futeból Timor-Leste husu bá Sekretáriu Jerál FFTL atuál Gregório Correia atu demite an hosi kargu ne’e tanba konsidera nomeasaun ne’e la hetan konsensu hosi assosiasaun Futeból sira alias ilegál.

Prezidente assosiasaun Futeból Ermera, Lomelino Salsina hateten, assosiasaun 13 ne’ebé mak prezente iha ne’e, hanesan Prezidente assosiasaun Munisipiu no prezidente assosiasaun profisionál inklui kampiaun liga I, ne’ebé mak reprezenta ida-idak nia assosiasaun ho boa vontante hakarak hato’o katak, desizaun kongressu extraordináriu iha 10 Novembru 2023 nomeia vise Prezidente FFTL sai hanesan Prezidente interinu no lori nomeia hikas Gregório Correia bá fali Sekretáriu Jerál FFTL depois regjigna an iha dia 26 Outubro 2023.

Ezijénsia ne’e tanba assosiasuan sira nota katak, Gregório Correia  la neutru no inklina an hodi sai ekipa sussesu ba kandidatu seluk. Assosiasaun Sentru juvenil la’ós hanesan membru iha FFTL tuir estatutu art. 12.

“Ho razaun hirak ne’e hotu maka atu bele lori dezenvolve Futeból la’o ho di’ak, husu Prezidente interinu FFTL atu demite Gregório Correia hosi nia kargu hanesan Sekretáriu Jerál FFTL,” Lomelino Salsina hateten.

Nia hatutan, tuir art.26 estatutu FFTL no Art. 38 estatutu Assosiasaun Munisipiu, Prezidente de’it mak bele reprezenta assosiasaun no iha direitu bá vota ka ema seluk ne’ebé mak hetan nomeasaun hosi Prezidente assosiasaun.

Tanba ne’e, husu atu esklui assosiasaun Sentru Juvenil hosi membru FFTL tanba la mensiona iha estatutu FFTL art.12.

“Ami hato’o ho respeitu bá Komité eleitorál atu hala’o servisu ho neutru no transparánsia no ami sei hato’o ami nia rekursu bazeia bá kódiku eleitorál art.12,” nia subliña.

Ho nune’e husu ba hotu-hotu atu mai hamutuk lori futeból Timor Leste bá oin liu hosi respeita malu no hakruk bá estatutu, no konvida nafatin atu fó susesu ba kongressu iha 10 Janeru 2024 ho demokrasia, transparánsia no neutralidade iha ámbitu domin no dame.

Hatutan.com tenta halo konfirmasaun ho Sekretáriu Jerál FFTL, Gregório Correia maibé laiha fatin no tenta via telefónika maibé númeru kontkatu fora da area kobertura ka dezligadu.

Jornalista: Vito Salvadór