Hatutan.com, (20 Dezembru 2023), Díli-Sekretáriu Jerál partidu FRETILIN,  Mari Alkatiri, husu IX Governu Konstitusionál ne’ebé lidera hosi Primeiru-Ministru, Kay Rala Xanana Gusmão, atu investe  dadaun ona iha diversifikasaun bá ekonómia iha rai-laran.

Lee Mós : OJE 2024 bá PN $17.780.054 Passa iha Espesialidade, Hasai Ona Subsídiu Transporte

Mari Alkatiri hato’o rekomendasaun ida-ne’e, durante partisipa no halo mós intervensaun iha plenária Parlamentu Nasionál (PN), hafoin votasaun finál globál bá proposta Orsamentu Jerál Estadu (OJE) tinan 2024 nian, Kuarta (20/12/2023).

Sekretáriu Jerál partidu FRETILIN,  Mari Alkatiri. Foto/Elio dos Santos da Costa

“Ita tenke hahú investe agora, iha diversifikasaun ekonómika, no atu harii saida mak sira bolu, ekonómia reziliente, ekonómia sirkulár. Ne’e mak ita tenke halo,” Mari Alkatiri fó hanoin.

Iha okaziaun ne’e, Alkatiri husu mós bá deputadu sira hotu iha PN, atu hakotu tiha konflitualidade, konflitu inter-orgániku. Estadu ne’e iha nia órgaun soberánia haat, maibé nia lakohi koalia barak ida-ne’e, tanba nia prezensa iha PN, la’os atu fó fali lisaun.

“Bainhira konflitu entre inter-orgániku mosu, estadu rahun. Hapara tiha ida-ne’e. Ohin loron, ita asiste konflitu interorgániku, no ha’u hanoin, maka ne’e de’it, pontu hirak ne’e mak ha’u hakarak tau iha ne’e,” Alkatiri hateten.

Molok atu hakotu intervensaun, Mari Alkatiri, haree katak konfrontasaun iha parlamentu loron hirak ne’e, nia hanesan fundadór sente laran moras. Tanba ida-ne’e mak, ohin, nia bá fali PN atu tuur ‘provizóriu’ iha ninia kadeira.

“Ha’u nia laran moras. Tanba ne’e, ha’u husu atu mai tuur fali iha ha’u nia kadeira PN para ha’u bele hatete buat ruma. Dalan laiha bá ita atu la’o bá oin, bainhira ita la servisu hamutuk. Dalan só bele iha bá ita atu la’o bá oin, bainhira ita simu katak, hothotu bele fó ninia kontribuisaun bá rai ida-ne’e,” Alkatiri tenik.

Sekjer  FRETILIN ne’e husu bá deputadu sira hotu iha Uma-fukun PN atu respeita entendimentu, para respeita estadu hanesan lema kontinuidade. Governu bele muda, no buka dalan bá entendimentu, bainhira ema hothotu hakarak atu harii estadu ida ne’e, sai estadu direitu demokrátiku, sai estadu ida forte, no sai estadu ida bá jerasaun bá jerasaun.

“Ita tenke identifika didi’ak kauza nasionál. Kauza nasionál, la’ós kauza partidu ida nian. Kauza nasionál maka atu hatuun kiak, kombate probreza. Sé kauza nasionál atu hatuun ki’ak, inimigu la’ós partidu a, ka partidu b. Inimigu mak ki’ak, la’ós ema kiak. Ne’e mak ita tenke hatene. Sé ita la hamutuk hateke bá oin, tuir dalan sira hanesan ne’e, ita sei sidi, ita sei monu iha falan klaran,” Mari Alkatiri afirma tan.

Jornalista: Rogério Pereira Cárceres