Hatutan.com, (14 Dezembru 2023), Díli—Prezidente Repúblika (PR), José Ramos-Horta sente orgullu tanba jornalista Timoroan Francisco Simões atuál Xefe Redasaun média online Hatutan.com manán prémiu Internasionál Anti Korrupsaun 2023 iha Estadus Unidus Amérika (UEA).

Ekipa redasaun no multimédia Hatutan.com hasai foto hamutuk ho Prezidente Repúblika, José Ramos-Horta iha serimónia aniversáriu Hatutan.com ba dala ida no iha ámbitu asina akordu asina Memorandum of Understanding (MoU) ho Telkomcel kona-bá uza Sim Card Telkomcel ho pulsa zero bele asesu notísia iha portál Hatutan.com, iha Suai Room, Timor Plaza, Kuarta (12/10/2022). Foto Hatutan.com/Elio dos Santos da Costa.

“Ne’e hanesan orgullu ida bá média hotu-hotu, liu-liu bá profisionais jornalista sira tanba iha Timoroan ida manán prémiu internasionál iha área luta kontra korrupsaun. Parabéns bá Hatutan.com no jornalista premiadu hanesan mós Xefe Redasaun bá média ne’e. Papél média nian bá luta kontra korrupsaun, injustisa no ilegalidades ne’e importante tebtebes. Há’u nia parabéns ba imi,” Prezidente Repúblika hato’o parabéns ba Hatutan.com iha Palásiu Prezidensiál Nicolau Lobato Bairr-Pité, Kinta (14/12/2023).

Lee Mós: SEKOMS Kongratula Xefe Redasaun Hatutan.com Francisco Simões Ne’ebé Manán Prémiu Anti Korrupsaun Mundiál 2023 Iha EUA

Xefe Estadu hatutan, desde jornalista profisionál ida halo nia servisu iha área investigasaun ne’ebé tuir étika, faktus no laiha akuzasaun oin-oin, kontinua halo atu buka lia loos.

Manán na’in prémiu Anti-Korrupsaun Mundiál 2023, Xefe Redasaun Hatutan.com Francisco Belo Símões da Costa hasai foto hamutuk ho Ministru Negósiu Estranjeiru EUA, Antony Blinken no mós manán na’in 10 seluk mai hosi mundu, iha serimónia espesiál ida ne’ebé realiza iha edifísiu Ministériu Negósiu Estranjeiru AUA nian iha Washington DC, Kinta (17/11/2023) dadeer oras EUA nian no Sesta dadeer oras Timor-Leste nian. Foto: Espesiál.

Maibé, Ramos-Horta mós dehan katak, jornalista mós labele halo investigasaun liu hosi lia anin de’it tanba ema mós iha direitu ba nia dignidade, onra no naran di’ak.

“Ne’e duni kuandu faktualmente ne’e 100%, dadus ne’e iha ne’ebá hatudu, importante atu hakerek sai no lori buat loos ba oin hodi kontra korrupsaun no injustisa ne’ebé iha,” Ramos-Horta subliña.

Ikus liu Xefe Estadu husu atu média online Hatutan.com kontinua servisu ho sentidu Estadu hodi kontribui bá dezenvolvimentu iha país ne’e ho informasaun ne’ebé kredível no faktuál.

Jornalista: Vito Salvadór