Hatutan.com, (27 Novembru 2023), Díli—Primeiru-Ministru (PM), Kay Rala Xanana Gusmão, konsidera Timor-Leste (TL) ho Guiné Bissau nu’udár nasaun maun-alin, hahú kedan iha tempu funu 1975 mai to’o ohin loron.

Primeiru-Ministru (PM), Kay Rala Xanana Gusmão, simu vizita Prezidente Repúblika, Guiné Bissau, Umaro Sissoco Embaló, iha Palásiu Governu, Díli, Segunda (27/11/2023). Foto: Tomé da Silva.

Xanana Gusmão hato’o konsiderasaun ne’e, hafoin simu vizita espesiál hosi Prezidente Repúblika, Guiné Bissau, Umaro Sissoco Embaló, iha Palásiu Governu, Díli, Segunda (27/11/2023).

Lee Mós: TL-Guiné Bissau Hametin Kooperasaun iha Konjuntura Polítika Internasionál

“Prezidente mai hatudu sira-nia amizade, sira-nia laran luak mai ita hodi dehan katak, nu’udár maun, tanba sira uluk, maun ne’ebé mak foun liu. Nu’udár maun bá ita Timor-Leste ne’ebé foin ukun-an,” Xanana hateten.

Iha biban ne’e, Xefe Estadu Guiné-Bissau, Umaro Sissoco Embaló espresso sentimentu haksolok, tanba iha ninia vizita Estadu ne’e, konsege hasoru-malu mós ho Timor-Leste nia lider sira, liu-liu eis Komandante Em-Xefe FALINTIL, Kay Rala Xanana Gusmão.

“Ha’u halo tiha ona deklarasaun ida iha Palásiu ho Prezidente Ramos-Horta. Ha’u labele halo vizita Estadu ida-ne’e la ho komprimenta lider sira, komandante Xanana. Ha’u apresia, ami iha ne’e hodi komprimenta Primeiru-Ministru, Xanana Gusmão hanesan ita-nia lider mós,” Umaro Sissoco Embaló hateten.

Iha domingu (26/11/2023), horseik, Xefe Estadu Guiné-Bissau ne’e ho nia delegasaun sira hamutuk na’in-15 to’o iha Aeroportu Internasional Nicolau Lobato, Comoro, Dili, TL, tuku 13:15, oras lorokraik. Prezensa iha Dili, atu partisipa iha seremónia komemorasaun Loron Proklamasaun Independénsia Unilaterál RDTL nian bá dala-48 (28 Novembru 1975 to’o 2023).

Jornalista: Rogério Pereira Cárceres