Hatutan.com, (27 Novembru 2023), Díli—Vise Primeiru-Ministru, Ministru Koordenadór bá Assuntu Ekonómiku, Ministru Turizmu no Ambiente (MKAE-MTA), Francisco Kalbuadi Lay sei hasai duni funsionáriu kazuais ne’ebé mak molok ne’e kontrata hosi Governu anteriór iha ninia ministériu.

Notifikasaun ne’ebé hasai hosi Vise-Primeiru-Ministru, Ministru Koordenadór bá Asuntu Ekonómiku, Ministru Turizmu no Ambiente, Francisco Kalbuadi Lay, iha Sesta (17/11/2023).

Haktuir bá notifikasaun ne’ebé hasai hosi Vise-Primeiru-Ministru, Ministru Koordenadór bá Asuntu Ekonómiku, Ministru Turizmu no Ambiente, Francisco Kalbuadi Lay, iha Sesta (17/11/2023), solisita bá dirijete másimu sira iha Instituisaun Públiku (IP) no Empreza Públika (EP) atu notifika funsionáriu kontratatu sira ne’ebé ho termu sertu, katak, sira nia kontratu sei termina iha 31 Dezembru tinan ne’e, no sei la halo tán renovasaun.

Lee Mós: MOP Sei Hapara Kontratu Projetu Sira Ne’ebé Husik Hela De’it

Karta notifikasaun ida-ne’e ho baze bá Dekretu-Lei Númeru 46/2023, loron 28 fulan-Jullu ne’ebé mak estabelese kona-bá Orgánika IX Governu Konstitusionál nian, iha artigu 2 no 3.

Foin lalais ne’e Hatutan.com esforsu hodi konfirma kona-bá notisikasaun ne’e, Kalbuadi rekoñese duni katak, karta ne’e nia rasik mak halo no marka asinatura, maibé notifikasaun ida-ne’e la’ós bá IP ho EP hot-hotu. Bá de’it iha sira ne’ebé tutelada iha Ministériu Koordenadór Asuntu Ekonómiku nian.

“Ha’u halo karta ne’e bá ha’u nian de’it. La’ós bá ema selseluk. Imi jornalista sira mak halo heboh. Ha’u hateten dala-ida tán, IP ho EP sira lalika preukupa. Ida-ne’e só bá IP ne’ebé mak iha MKAE nia okos. Rua de’it no seluk laiha. Lalika mai politiza fali buat sira ne’e,” Kalbuadi Lay hatán bainhira jornalista konfirma asuntu ne’e, foin lalais ne’e.

Iha orgánika IX Governu Konstitusionál, Institutu Públiku no Empreza Públika sira ne’ebé tutelada bá MKAE-MTA mak hanesan, Centro Nacional de Formação Profissional e Emprego de Timor-Leste (CNFPE), Centro Nacional de Formação Profissional Becora (CNFP-Becora), Instituto Nacional de Desenvolvimento de Mão-de-Obra, I.P. (INDMO), Inspeção-Geral do Trabalho (IGT).

Autoridade de Inspeção e Fiscalização da Atividade Económica, Sanitária e Alimentar, I.P. (AIFAESA), Instituto para a Qualidade de Timor-Leste, I.P. (ITQL, I.P.), Centro de Convenções de Díli (CCD), Instituto de Pesquisa, Desenvolvimento, Formação e Promoção do Bambu, I.P. (Instituto do Bambu).

Serviço de Registo e Verificação Empresarial, I.P. (SERVE), Comissão Nacional para a Facilitação do Comércio (CONFAC), Instituto de Apoio ao Desenvolvimento Empresarial (IADE), a Agência de Promoção de Investimento e Exportação de Timor-Leste, I.P. (TradeInvest Timor-Leste, I.P.), a GESPIN – Gestão de Parques Industriais, S.A.

Centro Logístico Nacional (CLN), Autoridade de Turismo de Timor-Leste, I.P. (ATTL, I.P.), Centros de Turismo e de Informação Turística, Centros de Restauração / Food Courts, as Pousadas, a Autoridade Nacional de Licenciamento Ambiental, I.P. (ANLA). Autoridade Nacional Designada para o Combate às Alterações Climáticas, I.P. (AND).

Jornalista: Rogério Pereira Cárceres