Hatutan.com, (24 Novembru 2023), Díli—Prezidente Repúblika (PR), José Ramos-Horta kontra alterasaun bá estatutu deputadu sira ne’ebé fó de’it benefísiu ezazeradu bá elite polítiku sira.

Prezidente Repúblika (PR), José Ramos-Horta.

Tanba ne’e, Xefe Estadu apela bá deputadu sira tenke haree ho povu nia moris no labele fó de’it benéfísiu ezageradu bá elite polítiku sira.

Lee Mós: Ho Subsídiu Transporte, Deputadu Sira La Lori Karreta PN bá Uma

Prezidente Repúblika José Ramos-Horta hato’o deklarasaun ne’e relasiona ho projetu Lei Nú. 4/VI (1”), ne’ebé prosede ba alterasaun datoluk ba Estatutu Deputadu tuir Lei Nú 5/2004, de 5 de Maio, ne’ebé altera ba Lei nú. 7/2017, de 26 de abil e 4/2023, de 25 de Janeiro, iha artigu 12 ne’ebé ko’alia kona-bá subsídiu bá deputadu sira, iha ne’ebé hateten katak kada deputadu, sei iha direitu ba subsídiu transporte kada fulan ho montante $1.600.

To’o agora Xefe Estadu seidauk koñese didi’ak emenda ida-ne’e ka proposta alterasaun lei estatutu deputadu sira nian, tanba ne’e sei buka hatene no estuda estatutu deputadu sira nian molok halo desizaun ruma.

“Ha’u hateten kedan, ha’u sei estuda kle’an ho seriedade no sei atua bazeadu konsiénsia,” Ramos-Horta hateten iha Palásiu Prezidensiál Nicolau Lobato Bairr-Pité, Sesta (24/11/2023).

Xefe Estadu sei ko’alia ho Primeiru-Ministru Kay Rala Xanana Gusmão no líder partidu koligasaun sira CNTR no PD atu haree ida-ne’e tanba ne’e sériu.

“Benéfísiu ne’ebé ejazeradu bá deputadu sira ne’e bele hanesan kestaun ida étika no morál no Xefe Estadu sei estuda ida ne’e didi’ak. La signifika, buat ruma nune’e mai keta hanoin katak ha’u atu asina de’it,” nia subliña.

Antes ne’e, Prezidente Parlamentu Nasionál, Maria Fernanda Lay hateten, bainhira subsidiu bá deputadu sira pasa ona, signifika deputadu sira sei la utiliza ona karreta Parlamentu Nasionál nian, subsidiu ba manutensaun mós sei la fó, subsidiu ba roda mós sei la fó, no sei diminui.

Sei dada fila prado no pajero sport, ho subsidiu ne’ebé iha deputadu sira bele halao sira nia servisu hanesan fiskalizadór no subsidiu ba kombustivel bele diskute no sei tau-matan liu-liu bainhira deputadu sira halo dezlokasaun ba munisípiu, maibé iha Dili laran sei tetu, depende ba interpretasaun ba viatura sira ho subsidiu transporte ne’ebé sei fó.

Jornalista: Vito Salvadór