Hatutan.com, (13 Novembru 2023), Díli—Prezidente Repúblika (PR), José Ramos-Horta, hola inisiativa ona atu organiza enkontru ida ho xefe suku eleitu sira atu ko’alia programa simples sira ne’ebé tenke hala’o iha suku no aldeia laran.

Lee Mós: Eleisaun Suku Segunda Volta Kontinua ho Sistema Manuál

Pezidente Repúblika, José Ramos-Horta partisipa iha eleisaun órgaun suku segunda volta iha Sentru Votasaun EBC 17 Abríl, Suku Metiaut, Díli, 13 Novembru 2023. Foto/Vito Salvadór

Hafoin ezerse nia direitu síviku iha eleisaun órgaun suku segunda volta iha Sentru Votasaun EBC 17 de Abríl, Suku Metiaut, Díli, Segunda dadeer (13/11/2023), Xefe Estadu haktuir bá jornalista sira katak eleisaun órgaun suku ne’e importante tebes no nia espera katak númeru kandidatu xefe suku feto sira bele barak liután.

Ramos-Horta ne’ebé foin fila hosi vita Estadu bá Brunei Darussalam ho Filipina ne’e haktuir,  nia koñese xefe suku sira balun ne’ebé servisu di’ak tebes hodi halo inisiativa dezenvolve suku, mezmu s=orsamentu laiha.

“Atu eleisaun órgaun suku ne’e feto ka mane mak eleitu depende bá desizaun eleitoradu nivel aldeia no suku sira. Eleisaun suku ne’e importante tebes ba ita-nia demokrasia, Governu tenke tau matan liután bá xefe suku ho xefe aldeia sira, tanba sira mak iha baze, sira mak besik liu povu no rezolve povu nia problema, sira mak abut estadu nian  iha baze,” Ramos-Horta hateten.

Liu tiha eleisaun órgaun suku segunda volta ne’e, Ramos-Horta promete sei halo reuniaun ho xefe suku eleitu sira para haree programa balun iha suku nia laran. Simples liu maka programa rekolla lixu iha suku sira atu evita moras bá komunidade.

Seluk fali tuir Ramos-Horta,  suku sira ne’ebé ai, laiha jardín bele halo programa kuda ai-oan no kuda ai-funan no bele mós organiza halo kampu desportiva bá juventude sira.

“Diálogu iha suku laran tenke kontinua atu evita problema iha suku laran. Buka organiza komunidade sira atu partisipa iha atividade suku bá hariis pás no estabilidade,” Ramos-Horta tenik.

Jornalista: Vito Salvadór