Hatutan.com, (08 Novembru 2023), Díli—Durante fulan Outubru tinan ne’e, Polísia Nasionál Timor-Leste (PNTL) liuhosi Departamentu Tránzitu no Seguransa Rodoviáriu Nasionál, kontribui reseita $68.650 bá kofre Estadu.

Membru PNTL husi Unidade Tranzitu halo simulasuan simu bainaka bá selebrasaun 19 to’o 20 Maiu 2022. Foto/Hatutan.com

Xefe Departamentu Tránzitu Nasionál, Superintendente Asistente Luis Costa informa, dadus ne’ebé mak sira rekolla mai hosi munisípiu hotu-hotu durante fulan Outubru rejista kazu infrasaun 2.054.

Lee Mós: Loron 20, Tránzitu Díli Hatama $25.757 bá Kofre Estadu

“Hosi númeru kazu ne’e, iha tipu infrasaun 1.895 no iha infrasaun tolu mak konsidera boot liu mak hanesan kontra órden autoridade tránzitu nian hamutuk 420, kondús motorizada maibé la uza kapasete iha 320, la lori dokumentu orijinál 261,” Luis Costa informa liuhosi konferénsia imprensa iha kna’ar fatin, Kuartél Jerál PNTL, Caicoli, Kuarta (08/11/2023).

Infrasaun hirak ne’e, ekipa Departamentu Tránzitu no Seguransa Rodoviáriu Nasionál foti kedan medida hodi prossesa tuir Lei, liu-liu aplika sansaun administrativa. 

Nune’e, totál koimas ne’ebé rekolla hosi munisípiu 14, konsege hatama osan bá konfre Estadu hamutuk $51,916.000

Totál koimas ne’ebé mak ekipa Departamentu Tránzitu no Seguransa Rodoviáriu Nasionál, rekolla hosi parte fronteira tolu, Batugade, Salele nomós Sakato, konsege hatama osan bá iha kofre Estadu hamutuk $16,694.000.

Dadus Asidente

Iha biban ne’e, Superintendente Asistente Luis Costa informa mós kona-bá dadus asidente ne’ebé akontese iha territóriu durante fulan-outubru konsege rejista kazu ho totál 168.

“Hosi númeru kazus ne’e ita rejistu ema lakon vida hamutuk ema nain 8, kanek todan 47 no kanek kaman 192. Hosi 168 kazus ne’e iha kazu 6 mak ita konsege prossesa finál, prossesa bá Tribunál 5, sei iha prossesu nia laran iha 76 kazu, rezolve iha nível famíliár hamutuk 80,” nia hateten.

Tuir Departamentu Tránzitu no Seguransa Rodoviáriu Nasionál nia konkluzaun katak, kazu asidente sira ne’e mosu  kauza hosi fatór umanu ho 95% no fatór veíkulu ka Transporte rasik ho 5%.

Jornalista: Rogério Pereira Cárceres