Hatutan.com (18 Outubru 2023), Díli–Ministra Saúde Elia Amaral husu jornalista Hatutan.com atu labele preokupa ho prosesu rekrutamentu asesór iha Gabinete Ministra Saúde  tanba tuir nia, ne’e responsabilidade Ministra nian.

Lee Mós: Problema Sériu Iha Ministériu Saúde, Lian Hosi Médiku Espesialista Ne’ebé Lian Laek

Ministra Saúde Elia Amaral. Foto/Tome da Silva

Informasaun ne’ebé espalla iha rede sosiál Facebook kestiona asesór ida iha Gabinete Ministra Saúde nian ne’ebé deskonfia ho nivel edukasaun sekundária no durante ne’e servisu iha fabrika ida iha Dungannon iha Norte Irlanda.

Liga bá asuntu refere, Ministra Saúde Elia Amaral hateten bá Hatutan.com atu la bele preokupa ho informasaun sira espalla iha sosiál mídia Facebook, maibé haree ba prestasaun servisu funsionáriu sira-nian.

“Preokupa bá iha prestasaun servisu de’it, oinsá atu atende bá iha kualidade atendimentu, ida gabinete nian ha’u mak responsabilidade. Ita-boot pergunta ba iha oinsá atu hatán ba iha prestasaun servisu  atendimentu,” Ministra Elia Amaral ba hateten  hafoin partisipa Reuniaun Konsellu Ministru iha Palásiu Governu, Kuarta (18/10/2023)

 Iha semana hira liubá viral iha mídia sosiál Facebook kona-bá deskonfia asesór prinsipál  iha gabinete Ministra Saúde (MS), Elia Amaral laiha kualifikadu estudu ka sertifikadu hosi kursu formasaun  ruma liga ho tarefa servisu hanesan asesór prinsipál ida.

Jornalista: Leopoldina de Carvalho