Hatutan.com, (14 Outubru 2023), Abu Dhabi- Prezidente Uniaun Emiradu Árabe (UEA) Sheikh Mohamed bin Zayed Al Nahyan kompromete tulun Timor-Leste harii rezidénsia universitáriu iha Timor-Leste atu joven timoroan sira bele estuda no eskola.

Lee Mós: Embaixadór Abdullah Salem Aidhaheri Simu Ramos-Horta Iha UEA

Delegasaun Timor-Leste ne’ebé lidera hosi Prezidente Repúblika, José Ramos-Horta, hasoru malu ho rezidente Uniaun Emiradu Árabe (UEA) Sheikh Mohamed bin Zayed Al Nahyan iha Abu Dhabi, Sesta (13/10/2023). Foto/Vito Salvadór

Kompromisu Prezidente UEA, Sheikh Mohamed bin Zayed Al Nahyan nian ne’e hato’o diretamente bá Prezidente Repúblika (PR), José Ramos-Horta, iha enkontru Estadu ne’ebé hala’o iha Abu Dhabi, Sesta (13/10/2023).

“Tinan 20 nia laran ona mak ha’u mehi bá buat ida no ha’u konta bá prezidente Uniaun Emiradu Árabe  Katak ha’u haree joven sira iha Timor-Leste, liu-liu estudante sira hela iha fatin-fatin no moris ho kondisaun ida ladún di’ak, liu-liu estudante sira ne’ebé mai husi foho ne’e, hamutuk de’it iha kuartu ki’ik oan ida, bee-moos la sufisiente, sintina laiha, dapur laiha no ida-ne’e ha’u haree dala barak loos ho ha’u nia matan,” Ramos-Horta haktuir bá  Sheikh Mohamed bin Zayed Al Nahyan.

Jornalista Hatutan.com, Vito Salvadór ne’ebé akompaña vizita Xefe Estadu Timor-Leste bá Uniaun Emiradu Árabe  relata katak Prezidente Repúblika (PR), José Ramos-Horta mehi iha tinan barak nia laran atu halo buat ruma no iha tempu saudozu Fernando de Araújo La Sama asume kargu hanesan Ministru Edukasaun, fó hanoin atu haree, tau atensaun baárezidénsia universitáriu, no ne’e mós la konsege.

PR José Ramos-Horta hasoru malu ho Prezidente Uniaun Emiradu Árabe (UEA) Sheikh Mohamed bin Zayed Al Nahyan iha Abu Dhabi, Sesta (13/10/2023). Foto/Vito Salvadór

“Ohin ha’u hateten bá liurai UEA nian, ha’u nia pedidu ida de’it bá ita, buat sira seluk bele halo tuir hanesan investimentu, bele halo empréstimu, mais buat ida ha’u halo pedidu mak favór halo rezidénsia universitária, atu estudante sira ne’ebé mai husi foho, fatin bá sira atu hela laiha, sira bele hela iha rezidénsia universitáriu ne’e no ha’u ko’alia ida-ne’e bá nia no nia konkorda, hafoin ko’alia remata nia hateten buat hotu-hotu ne’ebé ha’u ko’alia ne’e ha’u apoia maibé ha’u gosta liu mak rezidénsia universitáriu no ha’u sei halo,” José Ramos-Horta haktuir ho kontente.

Ramos-Horta subliña kona-bá rezidénsia universitáriu Prezidente Uniaun Emiradu Árabe la presiza tan atu halo karta ofisiál ruma mai, maibé nia prontu no sei diretamente halo no fó apoiu ba-ida ne’e.

“Ha’u dehan depois fila mak ha’u halo karta ofisiál ida mai, maibé nia dehan lalika, ha’u hatene ona no agora ha’u fila ba Díli buka rai para buat ne’e sai realidade ida no ha’u kontente loos,” Ramos-Horta haktuir.

Xefe Estadu ne’e informa rezidénsia universitáriu ne’e sei kompleta ho fasilidade sira hanesan kantina, sentru médiku, biblioteka, bele mós biblioteka eletróniku atu fasilita estudante sira estuda avontade. ***