Hatutan.com, (13 Outubru 2023), UEA—Prezidente Repúblika (PR), José Ramos-Horta ho delegasaun to’o iha Uniaun Emiradu Árabe (UEA) no simu direta hosi Embaixadór Uniaun Emiradu Árabe naun rezidente bá Timor-Leste, Abdullah Salem Aidhaheri.

Embaixadór Uniaun Emiradu Árabe naun rezidente bá Timor-Leste, Abdullah Salem Aidhaheri simu Prezidente Repúblika (PR), José Ramos-Horta ho delegasaun iha Aeroportu Internasionál Dubai, Sesta (13/10/2023). Foto: PR.

Embaixadór Uniaun Emiradu Árabe ba Jakarta no naun rezidente ba Timor-Leste, Abdullah Salem Aidhaheri haksolok simu Prezidente Repúblika, José Ramos-Horta no diplomata ne’e informa bá Xefe Estadu kona-bá situasaun sira inklui atividade sira ne’ebé Xefe Estadu sei hala’o durante estadia iha Uniaun Emiradu Árabe.

Lee Mós: Ramos-Horta Hala’o Vizita Ofissiál bá Emiradus Árabes Unidus no Partisipa Simeira ASEAN-GCC

Hafoin hosi Aeroportu Internasionál Dubai, Prezidente Repúblika José Ramos-Horta ho delegasaun kontinua kedan bá iha Abu Dhabi no sei hela Otél The St.Regis AbuDhabi Nation Tower, atu partisipa iha enkontru bilaterál sira ne’ebé sei akontese tuir ajenda ne’ebé planeadu.

Tuir ajenda, ohin loron Sesta (13/10/2023), Prezidente Repúblika, José Ramos-Horta sei hala’o sorumutu bilaterál dahuluk ho nia omólogu, Sua Majestade, Sheikh Mohamed bin Zayed Al Nahyan, ho Prezidente Parlamentu, Primeiru-Ministru Dubai, ne’ebé mós hanesan Vise-Prezidente no “Liurai Dubai,” entre ofisiál sira seluk ne’ebé iha pozisaun aas iha nasaun ne’e.

Prezidente mós sei iha oportunidade atu hasoru-malu ho seitór privadu liuliu iha área investimentu nian, no sei vizita instalasaun refinaria sira iha Abu Dhabi.

Ajenda ofisiál ne’e mós inklui han-kalan ho Sekretariu Jerál ba Prémiu Zayed Fraternidade Umanu nian, Juis Abdusalam.

To’o tinan ida-ne’e nia rohan, Timor-Leste sei loke reprezentasaun diplomátika iha Abu Dhabi, hodi reforsa nasaun nia prezensa iha rejiaun ne’e.

Embaixadór Uniaun Emiradu Árabe naun rezidente bá Timor-Leste, Abdullah Salem Aidhaheri simu Prezidente Repúblika (PR), José Ramos-Horta ho delegasaun iha Aeroportu Internasionál Dubai, Sesta (13/10/2023). Foto: PR.

Hafoin vizita ofisiál ne’e, iha sidade ida de’it, Prezidente Repúblika, ho konvite hosi Konferensia Nasoins Unidas nian kona-bá Komérsiu no Dezenvolvimentu – UNCTAD, sei kontinua partisipa iha sorumutu ida ho títulu “Semeira kona-ba Investimentu ba Lider Globál,” ne’ebé sai hanesan oradór prinsipál ida.

Iha loron 18 fulan-outubru, Prezidente no delegasaun sei halo viajen ba Riyadh, Arabia Saudita, iha ne’ebé sira sei partisipa iha Simeira ASEAN-GCC (Gulf Cooperation Council) iha loron 20 fulan-outubru no Prezidente Repúblika mós sei hala’o sorumutu bilaterál ho lider sira Estadu Gulfu.

Timor-Leste, mak membru observadór ASEAN nian, assume hanesan kompromissu ida hodi assegura nia prezensa no partisipasaun iha sorumutu ASEAN hotu-hotu. Aleinde ne’e, sorumutu ida-ne’e fó mós oportunidade, liuliu atu estabelese kontaktu nivel aas ho lider sira iha rejiaun ida-ne’e.

GCC inklui hosi Estadu Kuwait, Qatar, Oman, Arabia Saudita, Bahrain no Emiradus Arabes Unidus.

Jornalista: Vito Salvadór