Hatutan.com (12 Outubru 2023), Díli—Ministériu Justisa (MJ) liu hosi Vise-Ministru bá Fortalesimentu Institusionál, Paulo Manuel da Silva dos Remédios promete sei hamoos hotu funsionáriu Broker sira iha Diresaun Munisipál Konservatóriu Servísu Rejistu Notariadu Díli, ne’ebé lor-loron haís sidadaun sira nia osan, ne’ebé bá trata dokumentu Billete Identidade (BI), Sertidaun Repúblika Demokrátiku Timor Leste (RDTL), Sertidaun Kazamentu no Sertidaun Óbitu (Mate), inklui difikulta sidadaun tenke forma naruk.

Vise-Ministru bá Fortalesimentu Institusionál, Paulo Manuel da Silva dos Remédios. Foto: Tome da Silva.

“Tanbá ne’e mak daudaun ita rejista ona sistema dijitál ida ho naran Janela Únika. Ida-ne’e bele limpeza hotu broker sira, evita broker no evita korrupsaun. Ema hotu iha direitu simu informasaun, komesa agora ba futuru ema hotu kontaktu de’it MJ ho nia diresaun tomak liu hosi pájina facebook, tanba bele fasilita, se ita rejista ona maka la persiza tán bolu ema broker tenke tama sai iha laran,” Paulo Manuel da Silva dos Remédios hateten bá Hatutan.com iha Dili, Kinta (12/10/2023).

Lee Mós: Forma Naruk Trata BI-Sertidaun RDTL, Tenke Investiga Funsionáriu Broker Sira

Koná-bá levantamentu no tratamentu dokumentu iha Minitériu Justisa, Paulo Manuel da Silva dos Remédios dehan, Gabinete hahú loke ona pájina facebook, iha ona formuláriu ida bá projetu Governu ho naran Janela Únika, hanesan fatin ida ne’ebé povu hotu bele assesu bá informasaun hotu-hotu liu-liu kona-bá trata Billete Identidade, sertidaun RDTL no sira seluk tán ne’ebé tutela bá Minstériu Justisa.

“Depois de abitante sira assesu, bele halo perguntas, ekipa MJ fó resposta no fó informasaun kona-bá prosedimentu sira, hafoin simu informasaun kompletu mak foin bele marka data, halo inskrisaun no mai de’it ita hasai fotografia iha MJ hein halo. Abitante sira asina ida-ne’e de’it prontu ona, nune’e komunidade ka abitante sira labele ba-fila-ba-fila hodi estraga osan no gasta sira nia tempu hodi mai Notariadu trata dokumentu sira ne’e,” nia esplika.

Daudaun ne’e MJ aplika ona no komesa ho semana ida-ne’e, bá sistema ne’e rasik agora hahú halo ona sosializasaun bá munispiu tolu hanesan Ermera, Aileu no Liquiça, fulan Outurbu no Novermbru remata munisiu sira hotu.

Programa ida-ne’e tenke funsiona, tenke fó servisu di’ak bá povu hó informasaun sira ne’ebé kompletu ho transparente no evita ema tenke halai bá iha MJ hodi gasta tempu no gasta osan, liu-liu hamoos broker sira iha Notariadu laran.

Lee Mós: Diretór João Borges Laiha Tempu Hatán Preokupasaun Sidadaun Sira Kona-bá Funsionáriu Broker iha Servisu Notariadu Díli

Jornalista: Gloria Maia