Hatutan.com, (05 Outubru 2023), Díli-Polísia Nasionál Timor-Leste (PNTL) liuhosi Departamentu Tránzitu Nasionál submete ona kazu asidente tráfegu hamutuk 58 bá Ministériu Públiku (MP).

Lee Mós: Ema Na’in-12 Mate Tanba Asidente Tráfegu Iha Díli

Asidente trafégu iha Munisípiu Aileu, Kuarta (04/10/2023). Foto/supply

Xefe Departamentu Tránzitu Nasionál, Superintendente Asistente Luis Costa, Kinta (05/10/2023), relata katak, servisu tránzitu nian durante fulan-Janeiru to’o fulan-Setembru 2023, hosi komandu PNTL munisípiu mai to’o iha tránzitu nasionál rejistu kazu asidente tráfegu hamutuk 1462. Hosi númeru kazu hirak ne’e, ema na’in-57 mak lakon sira-nia vida, kanek todan  293, no kanek kaman iha 1762.

“Hosi kazu hirak ne’e, prosesu iha tránzitu no konsege lori bá rejistu iha Tribunál, iha kazu finál maka hamutuk 58, prosesu bá Tribunál 41, sei iha prosesu nia laran maka 763, rezolve a-nível familiar entre parte rua ne’e, hamutuk 700,” Xefe Departamentu Tránzitu Nasionál, Superintendente Asistente Luis Costa, informa bá jornalista sira liuhosi konferénsia imprensa iha kna’ar fatin, Kuartél Jerál PNTL, Caicoli-Díli.

Hosi kazu asidente hirak ne’e, ekipa tránzitu nasionál konklui katak, iha fatór tolu maka fó ninia influensia. Ida maka dezastre ne’e rasik. Puré-zemplu, nia persentajen boot liu maka, fatór umanu ka ema, ho porsentu 90 (90%), fatór veíkulu iha porsentu 5 (5%), no tuir fali maka fatór dalan ka natureza, estrada sira ne’e iha porsentu 5 (5%).

Halo Apreensaun bá Veíkulu Estadu 276

Komandante Luis Costa, informa katak, durante fulan-Janeiru to’o fulan-Setembru ne’e, sira halo mós atividade check point, swipping iha kapitál Díli no mós iha munisípiu sira hotu. Rezultadu hosi atividade rua ne’e, sira konsege prende evidénsia hamutuk 17,319. Kompostu hosi patrimóniu Governu nian hamutuk 276, transporte privádu sira ho totál 11,531, transporte públiku iha 986, no prende dokumentu hamutuk 4,526.

Hosi númeru evidénsia sira ne’e, infratór sira hamutuk 15,220 mak bá selu ona koima iha banku. Sira ne’ebé seidauk selu koima purvolta 2095, iha na’in-haat (4), maka pasa deklarasaun.

Krime ne’ebé infratór sira komete maka, kontra orden autoridade públika, ho totál 2980, kondús motorizada la utiliza kapasete, hamutuk 2453, la lori dokumentu orijinál, pur volta 2298.

Kontribui $733.26 bá Kofre Estadu

Xefe departamentu tránzitu nasionál, Superintendente Asistente Luis Costa, informa mós katak, hosi fulan-Janeiru to’o fulan-Setembru 2023, rekolla ona totál reseita ho $733.26 bá kofre Estadu.

Reseita ne’ebé rekolla hosi odamatan fronteira Terrestre, hamutuk $120.26, no reseita hosi infratór sira komete rasik, konsege hatama bá kaixa estadu ne’e, hamutuk $513.234.

Jornalista: Rogério Pereira Cárceres