Hatutan.com, (14 Setembru 2023), Díli— Primeiru Ministru (PM) Kay Rala Xanana Gusmão dezeja susesu bá atleta Timoroan na’in-58 ne’ebé reprezenta Timor-Leste (TL) hodi partisipa ASEAN Games 2023 bá dala-19 iha Hangzhou Xina.

Atleta Timoroan na’in-58 ne’ebé reprezenta Timor-Leste (TL) hodi partisipa ASEAN Games 2023 bá dala-19 iha Hangzhou Xina, hasoru-malu ho Primeiru Ministru (PM) Kay Rala Xanana Gusmão iha Palasiu Governu (13/09) molok dezlokasaun. Foto: GPM.

Atleta Timoroan 58 ne’e kompostu hosi feto na’in-24 fahe ba atleta feto na’in ualu (8), Ofisiál feto na’in-16 no mane na’in-34 ne’ebé mai hosi federasaun 10 hanesan, Tenis do Campo, Atletismu, Taekwondo, Karate-do, Natasaun, Federasaun Tiru, Boxe, Federasaun Halterofelismo, Badminton no Vollybool Praia.

Lee Mós: Ramos-Horta Motiva Atleta Paralímpiku Bá ASEAN Para Games

“H𝗮’𝘂 𝗱𝗲𝗷𝗲𝘇𝗮 𝘀𝘂𝘀𝗲𝘀𝘂 𝗯𝗮 𝗶𝗺𝗶 𝗵𝗼𝘁𝘂, 𝘁𝗲𝗻𝗸𝗶 𝗵𝗮𝗻𝗲𝘀𝗮𝗻 𝗻𝗲’𝗲 𝗱𝘂𝗻𝗶, 𝘁𝗮𝗻𝗯𝗮 𝗵𝗼 𝗱𝗲𝘀𝗽𝗼𝗿𝘁𝘂 𝗺𝗮𝗸 𝗶𝘁𝗮 𝗯𝗲𝗹𝗲 𝗽𝗿𝗼𝗺𝗼𝘃𝗲 𝗶𝘁𝗮 𝗻𝗶𝗮 𝗿𝗮𝗶𝗻 𝗻𝗼 𝗵𝗮𝘁𝘂𝗱𝘂 𝗶𝗺𝗶 𝗻𝗶𝗮 𝘁𝗮𝗹𝗲𝗻𝘁𝘂 𝗵𝗼 𝗽𝗿𝗼𝗳𝗶𝘀𝗶𝗼𝗻𝗮́𝗹,” Hatutan.com sita deklarasaun  Xanana Gusmão iha komunikadu.

Serimónia despedida dezlokasaun ne’ebé  hala’o iha Palasiu Governu, Díli, Kuarta (13/09) ne’e, Xanana husu ba atleta sira atu tau an hanesan embaixadór desportu hodi kompete iha atividade desportu ho profionál hodi foti no hamoris imajen desportu Timor-Leste.

Xanana konsidera jogu desportu saída de’it nu’udár atividade ida atu ema individu bele hatudu ka promove ninia telentu no tékniku kompetetivu atu bele manan iha jogu ida.

IX Governu kompromete sei tau-matan bá kondisaun desportu hotu iha Timor-Leste tuir politika ne’ebé trasa ona. 

Prezidente Sesante Comite Olimpico Nasionál Timor-Leste (CONTL), Mateus da Cruz agradese no husu bá atleta hotu-hotu kaer metin mensajen murak ne’ebé hato’o hosi PM Xanana inklui Prezidente Repúblika, José Rmaos-Horta.

Atleta hirak ne’e sei arranka hosi Timor-Leste ba Hangzhou Xina iha loron 16 fulan Setembru no fila-fila mai Timor iha loron 08 Outubro 2023.

Jornalista: Vito Salvadór