Hatutan.com, (13 Setembru 2023), Díli—Primeiru Ministru (PM), Kay Rala Xanana Gusmão, propoin ona naran rua mak hanesan Sérgio de Jesus Fernandes da Costa Hornai ho Rui Pereira dos Santos, bá Parlamentu Nasionál (PN) atu hili sé mak votu barak liu assume responsabilidade nu’udár Komissáriu foun bá Comissão Anti Corrupção (CAC).

Kandidatu Komiisáriu CAC, Sérgio de Jesus Fernandes da Costa Hornai ho Rui Pereira dos Santos. Foto repro.

Projetu Proposta Rezolusaun Parlamentu Nasionál ne’e Xanana Gusmão aprezenta iha Sorumutuk Konsellu Ministru nian iha loron 13 fulan-setembru tinan 2023.

Lee Mós: PN Kontinua Hein Proposta Kandidatu bá Komissáriu CAC

“Projetu Propósta Rezolusaun Parlamentu Nasionál ne’ebé aprezenta hosi Primeiru-Ministru, Kay Rala Xanana Gusmão, kona-bá naran rua ne’ebé sei propoin bá Parlamentu Nasionál bá kargu CAC hetan ona aprovasaun,” Hatutan.com sita komunikadu.

Tuir lejizlasaun ne’ebé vigóra, naran sira ne’ebé propoin hosi Governu agora, sei análiza no vota hosi Parlamentu Nasionál no sira-nia dezignasaun sei presiza maioria absoluta hosi deputadu ne’ebé marka prezensa, pelumenus katoluk haat (3/4) hosi deputadu sira ne’ebé daudaun ne’e funsaun efetiva hela.

Dadus pessoál kona-bá Sérgio de Jesus Fernandes da Costa Hornai ne’ebé Hatutan.com assesu hosi portal ofisiál CAC nian deskreve katak, Sérgio de Jesus Fernandes da Costa Hornai hanesan Komissáriu Comissão Anti-Corrupção (CAC) bá mandatu datoluk ne’ebé eleitu hosi Parlamentu Nasionál (PN) iha loron 15 Janeiru 2019 hosi assume knaar nu’udár Komissáriu CAC ba mandatu tinan haat (4) hahú husi tinan 2019-2023.

Antes assume knaar nu’udár Komissáriu CAC, Sergio sai mós hanesan membru Defensór Públika dezde tinan 2000 no assume kargu nu’udár Defensór Públika Gerál no Prezidente Konsellu Superiór Defensoria Públika Timor-Leste nian hahú husi tinan 2009 to’o 2017.

Sérgio sai mós membru ba Comissão Nacionál das Eleições (CNE) durante tinan 2013 no membru triajem Polisia Nacional Timor-Leste (PNTL) iha tinan 2016-2017.

Durante periodu okupasaun Indonezia, Sérgio sai mós membru no responsável iha organizasaun rezisténsia RENETIL ne’ebé tulun luta Timoroan sira nian ba auto-determinasaun, hahú husi tinan 1994 to’o tinan 1999, no nia termina nia estudu ho grau lisensiadu iha Direitu iha Universidade UNDIKNAS, Denpasar, Indonesia.

Hafoin iha periodu independénsia, Sergio partisipa barak liu iha kursu formasaun sira direitu sivíl nian no formasaun jurídiku iha Australia (2000) Lisboa Portugal (2001), no Sentru Formasaun Jurídiku Timor-Leste (2004-2017).

Kona-bá Rui Pereira dos Santos, antes ne’e assume mós kargu hanesan Komiss’ariu Adjuntu CAC Diresaun Edukasaun Kampaña no Peskiza.

Rui Pereira dos Santos nu’udár jurista professional ne’ebé hala’o knaar barak liu iha instituisaun judisiáriu iha Estadu Timor-Leste, dezde Timor-Leste hetan independénsia.

Durante iha periodu okupasaun Indonézia, hala’o knaar nu’udar asistente advogadu no advogadu iha Yayasan HAK.

Hafoin ukun-an, assume knaar nu’udar jurista, vise prezidente no prezidente Tribunál Distritál Dili. Hala’o mós knaar nu’udar Komisariu Alternativu CVA, Asesór Legál iha Ministériu Ekonomia no Dezenvolvimentu, Tékniku Legál iha MNEC, Asesór Legál iha Ministériu Estatál no Provedór Adjuntu Boa Guvernasaun iha PDHJ. Iha atividade akademika nian, sai Dosente no hanorin direitu iha UNDIL no UNPAZ.

Rui hasai no finaliza lisensiatura direitu iha Univerdade Kristen Satya Wacana (UKSW) Salatiga Indonesia, estudu komparativu kona-ba legal drafting ba Lei Violénsia Doméstíka iha Australia. Partisipa iha formasaun no treinamentu sira kona-ba lideransa, legal training kona-ba direitu umanu, advogadu, formasaun forensic no phatology iha área direitu umanu, juiz, prokuradór no defensor públiku, jurista iha área judisiál, jurista iha área konstituisaun no formasaun seluk iha nasaun sira ASEAN, Europa no Australia.

Rui mós partisipa no atende konferénsia internasionál iha nasaun barak ba asuntu sira International Family Court, Internacional Juvinile Justice no asuntu seluk tan iha país sira CPLP, ASEAN, Australia, Europa no Pacific.

 Jornalista: Rogerio Pereira Cárceres