Hatutan.com, (02 Setembru 2023), Díli—Governu da-sia ne’ebé lidera hosi Primeiru-Ministru (PM), Xanana Gusmão, nomeia antigu Prokuradór Jerál Repúblika, Longuinhos Monteiro bá asume kna’ar nu’udár Diretór Jerál Servisu Nasionál Intelijénsia (SNI).

Lee Mós: Xanana Apresia Servisu DNII-SNI ho Autoridade Polisiál

Xanana momentu nomeia Longuinhos Monteiro hanesan Komandante Jerál PNTL hodi troka Paulo de Fátima Martins. Foto/Dok. Espesiál

Tuir dokumentu ofisial hosi Primeiru-Ministru nian ne’ebé Hatutan.com asesu relata katak nomeasaun antigu Komandante Jerál Polísia Nasionál Timor-Leste (PNTL) Komisáriu Polísia Longuinhos Monteiro nian ne’e haktuir bá provizaun sira iha nu. 1 hosi artigu 9, Dekretu-Lei nu. 3/2009, loron 15 fulan-Janeiru, (Servisu Nasional Inteligencia), nomeasaun bá Diretor-Jeral Servisu Nasional Intelijénsia nu’udár responsabilidade Primeiru-Ministru nian.

Primeiru-Ministru nia nomeasaun antes ne’e, obrigatóriu liuhosi komunikasaun no konsultasaun ho Prezidente Republika, tuir termu sira nu. 2 hosi artigu ne’ebé hanesan. Konsidera apropriasaun, integridade, kapasidade téknika no profisionál ne’ebé rekoñese ona, ho esperiénsia universidade nian no esperiénsia ne’ebé boot liu iha asuntu legál no seguransa Longuinhos Monteiro nian, no mós esperiénsia ne’ebé boot iha servisu intelijénsia  Egas Moniz nian.

Konsidera katak kumpri hotu ona buat ne’ebé hakerek iha nú. 2 husi Artigu 9 Dekretu-Lein.2009/2009, loron 15 fulan-Janeiru, komunikasaun no konsultasaun antes ho Prezidente Republika.  Nune’e, tuir termu nu. 1 hosi artigu 9 Dekretu-Lei nu. 3/2009, loron 15 fulan-Janeiru (Servisu Nasional Intelijénsia), determina ka nomeia:

Longuinhos Rabindranatha Tagore Domingues dé Castro Monteiro nu’udar Diretor Jeral Servisu Nasional Intelijénsia (SNI) no nomeia mós  Egas dé Araujo Moniz nu’udár Vise-Diretór-Jerál SNI.

iha Governu da-8, liuhosi despaixu Primeiru-Ministru, Taur Matan Ruak nian, nomeia ka fó fiar bá Koronél Domingos da Câmara “Amico” nu’udár Diretór Jerál SNI. 

Longuinhos Monteiro momentu sei asume Komandante Jerál PNTL. Foto/Dok. Espesiál

Servisu Nasionál Iintelijénsia (SNI) nu’udár servisu Estadu nian ne’ebé iha responsabilidade atu elabora informasaun ne’ebé kontribui bá protesaun independénsia nasionál, interese nasionál, seguransa esterna no garante seguransa interna, prevene sabotajén, terrorismu, espionajén, krime organizadu, no hahalok ne’ebé bele altera ka destroi (sobu) Estadu Direitu ne’ebé estabelese liuhosi Konstituisaun RDTL.

SNI, servisu Estadu nian ne’ebé iha kompeténsia interna no esterna, laiha direitu atu halo violasaun bá direitus, liberdade no garantia ne’ebé konsagra iha Konstituisaun ka monu bá kompeténsia eskluzivu autoridade seluk ne’ebé hala’o funsaun seguransa interna, Ministériu Públiku ka Tribunál nian, no nia ajente sira laiha autoridade atu hala’o detensaun bá ema ka atu hala’o prosesu krime nian.

Jornalista : Vito Salvadór