Hatutan.com, (18 Agostu 2023), Díli—Komisaun C Trata Assuntu Finansas Públika, iha Parlamentu Nasionál (PN) preokupa ho Prezidente Autoridade (PA) Rejiaun Administrativa Espesiál Oecusse-Ambeno (RAEOA), Arsénio Paixão Bano ne’ebé “fa’an” rezidénsia Estadu iha área Fulolo, aldeia Sanane, Suku Costa, Sub-Rejiaun Pante Makasar bá eis Prezidente Autoridade RAEOA, Mari Bim Amude Alkatiri.

Prezidente Komisaun C, Cedelizia Faria dos Santos.

Tanba ne’e, Komisaun C promete sei dezloka bá RAEOA hodi halo fiskalizasaun bá kazu ne’e iha tempu besik, tanba konsidera aktu ne’e kontra Lei.

Lee Mós: Arsénio Bano “Fa’an” Uma Estadu iha Fulolo bá Alkatiri

Prezidente Komisaun C, Cedelizia Faria dos Santos hateten, maski seidauk bá halo fiskalizasaun, maibé iha plenária Deputadu sira mós levanta ona kazu ne’e durante audiénsia públiku ho Prezidente Autoridade RAEOA nian kona-bá kazu ne’e.

Cedelizia Faria dos Santos dehan, iha relatóriu pareser Komisaun C nian, sei mensiona parágrafu balun kona-bá assuntu Prezidente RAEOA fa’an rezidénsia Estadu Fulolo ba ema pessoál, nune’e bá oin bele haree kle’an liután, tanba to’o agora seidauk iha auditoria no investigasaun kle’an.

“Uma Estadu nian ne’ebé Estadu halo ho osan Estadu rasik, ikus mai fa’an bá ema pessoál ne’e labele. Klaru katak, labele tanba osan ne’e osan Estadu. Ita foti atu lori benefísiu bá povu tomak la’ós fó benefísiu bá ema ida ka rua de’it,” Cidalizia Faria dos Santos hateten bá Hatutan.com iha Parlamentu Nasionál, Sesta (18/08/2023).

Parte Komisaun C konsidera osan bá harii rezidénsia Fulolo ne’e mai hosi Estadu no Governu nian, nune’e Komisaun C iha direitu atu tun bá haree duni kona-bá ida-ne’e, tanba Komisaun hanoin katak la merese bainhira osan Estadu foti tiha hodi uza, depois fa’an fali bá ema individu ida ka rua ne’e la loos no ne’e kontra duni Lei.

“Absolutamente Komisaun C sei ba halo fiskalizasaun depois de Orsamentu Retifikativu aprova iha Parlamentu Nasionál,” nia subliña.

Komisaun C sei bá RAEOA tanba iha osan Estadu barak tebes ne’ebé presiza bá haree duni em relasaun ho osan sira ne’ebé gasta iha RAEOA, inklui rezidénsia Fulolo.

Antes ne’e Prezidente Autoridade RAEOA, Arsénio Paixão Bano klarifika katak, investimentu bá rezidénsia Fulolo ne’e uza osan mai hosi fundu espesiál dezenvolvimentu nian no ema bele sosa tanba Lei mak fó dalan ka regula atu oinsá osan bele tama fila-fali bá Kofre RAEOA nian.

Jornalista: Vito Salvadór