Hatutan.com, (27 Jullu 2023), Díli–Bá loron 120, Ministru Petróleu no Rekursu Minerais, Francisco da Costa Monteiro, deklara katak sei halo re-estruturizasaun iha setor petróleu  no re-estabelese negosiasaun ho Austrália no kompaña sira, hodi bele finaliza Petrolium Mining Code, Tax Regime, Production Sharing Contract iha tempu badak no hein katak, dokumentu sira ne’e bele finaliza antes tinan ne’e nia rohan hodi loke dalan bá negosiasaun hodi asegura kadoras Greater Sunrise (GSR) mai Timor-Leste.

Lee Mós : Xanana Firme Defende Kadoras Greater Sunrise Mai TL

Ministru Petróleu no Rekursu Minerais, Francisco da Costa Monteiro enkontru ho Komisaun D Parlamentu Nasionál, Kinta (27/07/2023). Foto/Mídia MPRM

Liuhosi enkontru ho Komisaun D Parlamentu Nasionál bá asuntu Ekonomia no Dezenvolvimentu, Kinta (27/07/2023), Ministru Petróleu no Rekursu Minerais, Francisco da Costa Monteiro, aprezenta prespektiva kona-bá explorasaun petrolífera ne’ebé implementa hosi empreza Timor Resources ho parseria husi TIMOR GAP iha Kosta Súl.

“Bele dehan katak, investimentu ida iha rai maran, investimentu pioneiru, ne’ebé di’ak ema tau osan ona to’o millaun $70 sempre iha dezafiu balun, sempre iha nia problema balun ne’ebé mosu, maibé hosi parte Governu iha kompromisu atu buka solusaun di’ak para la’o ba oin,” sita deklarasaun Ministru Petróleu no Rekursu Minerais, Francisco da Costa Monteiro iha pájina Facebook Ministro do Petróleo, SE. Francisco da Costa Monteiro.

Dadaun ne’e, empreza Timor Resource halo hela perfurasaun bá  posu petróleu iha Feto Kmaus, Liurai no Lafaek, Munisípiu Covalima no exekutivu buka hakle’an tan informasaun hodi dezenvolve iha tinan hirak mai.

Biban ne’e, Prezidente Komisaun D, Ricardo Baptista, husu Ministru Francisco da Costa Monteiro, atu aselera servisu sira ne’e hodi produz reseita mai mai Estadu iha tempu badak.

“Komisaun D la iha opozisaun, ami iha kompromisu bá povu no rai ida ne’e, la iha opozisaun, apoiu politiku sein reserva, hodi Governu bele halo servisu iha tempu besik,” Prezidente Komissaun D Ricardo Baptista afirma.

Molok ne’e, iha fulan-Janeiru 2023, Ministru Petróleu no Minerais iha Mandatu VIII Governu Konstitusionál nian, Victor da Conceição Soares hateten, prosesu negosiasaun bá konseitu dezenvolvimentu Greater Sunrise  paradu tanba iha dezentendimentu entre kompañia konsorsiu sira, TIMOR GAP, Woodside no Osaka Gas.

Kompañia konsorsiu sira hakarak enkuadramentu legal sira tenke konklui ona, tanba ne’e empreza konsorsiu sira la entende malu uitoan.

Lee Mós : Austrália Lataka Dalan Kadoras Greater Sunrise Dada Mai TL

Jornalista  Estajiáriu :  Lazaro Pereira Quefi