Hatutan.com, (05 Jullu 2023), Díli—Dezastre naturál hanesan bee-sa’e no rai halai inlkui mota tun hamate ema ida (estudante) iha munisípiu Lautém no estraga uma hamutuk 274 iha munisipiu sia.

Hahú kedan iha loron 02 to’o 04 jullu, udan ho intensidade bo’ot akontese rai-halai, rezulta uma 7 mak estragu iha aldeia Hatu-meta’udu, Suku Manutasi, Postu Administrativu Ainaro. Foto/Facebook.

Autoridade Protesaun Sívil (APC) liuhosi diretór Gabinete Relasaun Esterna, Anacleto Caetano informa, estragus hirak ne’e kauza hosi udan boot ne’ebé akontese durante loron rua tu-tuir malu entre 03 to’o 04 Jullu 2023.

Lee Mós: Xanana Orienta MOP-IGEADI-MSSI Halo Intervensaun no Salva Povu

“Munisipiu Manufahi iha uma 15, Covalima 188, Ainaro 17, Lautém ema ida lakon vida no na’in-tolu hetan fali ho kondisaun sei moris, Manatuto uma 2, Ermera uma 4, Baucau uma 2, Bobonaro uma 46. Totál familia afetadu iha munisipiu 9 hamutuk 274,” Anacleto Caetano hateten liuhosi konferénsia imprénsa iha knaar fatin APC, Caicoli, Kuarta (05/07/2023).

Diretór Anacleto informa mós katak, oras-ne’e daudaun, APC Munisípiu Manufahi, Ainaro no Covalima, kontinua hala’o observasaun hodi halo atualizasaun dadus iha fatin akontesimentu.

“Ekipa iha hela terrenu no halo hela levantamentu dadus hodi fó apoiu emerjénsia, hanesan hahán no la’ós ai-han bá vítima afetadu sira,” Anacleto informa.

APC sente no konsiente katak ho dezatre naturál ne’e, fó duni obstákulu boot tebes bá sira maibé ne’e la sai dezafiu bo’ot bá ekipa, maski ho kondisaun klima no situasaun udan ne’ebé fó impaktu atu assesu to’o lalais iha fatin akontesementu iha terrenu.

Kronolójia Akontesimentu Iha Manufahi

Iha loron 03 to’o 04 jullu, akontese udan ho intensidade boot durante oras-tolu nia laran, rezulta mota boot tun hodi sobu ponte Avatu kotu ka estragus totál.

Ponte ne’e lokaliza iha Postu Administrativu Same Vila, Suku Letefoho, Aldeia Rai-Ubu, ponte ne’e halo konetividade entre Same-Dili.

Iha loron ne’ebé hanesan, bee sobu uma 2 iha aldeia Lakalua, Suku Dotik no uma 13 iha aldeia Kolokau, Suku Uma-Berloik, Postu Administrativu Alas. Vítima sira ne’e transporta ona no hela provizóriu iha sede suku.

Covalima

Iha loron 03 to’o 04 jullu ne’e akontese udan ho intensidade boot halo Ponte Rai-ketan Suai estragus, hodi hakotu konetividade entre populasaun Suai Vila ho Zumalai. Ponte ne’e lokaliza iha Suku Belecassac, Postu Administrativu Maucatar.

Inundasaun afeta mós bá família uma 3 ho uma-lisan 2 iha aldeia Nadak, Suku Oges, Postu Administrativu Maucatar.

Bee-sa’e uma 102 iha aldeia Maucola, Suku Beco, Uma 57 iha Aldeia Bibi-atan, uma 24 iha Aldeia Ai-dantuik, Postu Administrativu Suai Villa. Uma 8 iha Aldeia Ai-Oan, Postu Tilomor Suku Lalawak.

Ainaro

Hahú kedan iha loron 02 to’o 04 jullu, udan ho intensidade bo’ot akontese rai-halai, rezulta uma 7 mak estragu iha aldeia Hatu-meta’udu, Suku Manutasi, Postu Administrativu Ainaro. Vítima sira transporta provizóriu bá familia viziñu.

Iha loron ne’ebé mak hanesan, akontese mós inundasaun, rezulta uma 10 hetan estragus iha Raimerlau, Suku Foho Ai-liku, Postu Administrativu Hato-Udo. Inundasaun ne’e, estraga mós irrigasaun inklui plantasaun natar kuaze hektáres 4 inklui kolam ikan ida.

Lautém

Iha loron 03 to’o 04 jullu, akontese udan ho intensidade maka’as, rezulta Suru-uaku tun, lori estudante na’in 4, feto 3 no mane 1.

Estudante feto na’in 3 ne’e konsege salva a’an, infelizmente estudante mane na’in-rua seluk mak mota lori. Vitima rua ne’e ida mak Joanico da Costa buka seidauk hetan (lakon) ho tinan 17.

Estudante sira ne’e mota lori bainhira fila hosi eskola EBC Odofuro, atu fila-fali bá sira-ninia uma, iha Lereadu, hakur mota mak mota lori, iha tuku 17:00, lorokraik Otl. Akontesimentu ne’e iha Postu Administrativu Lautém, Suku Manha II, Aldeia Lereadu.

Oras-ne’e daudaun ekipa APC Munisipiu Lautém, CVTL hamutuk ho komunidade buka-tuir hela vitima sira ne’ebé lakon.

Akontese udan-bo’ot durante oras 24 iha Munisipiu Lautem rezulta mós estragus bá estrada ligasaun Postu Tutuala nian, ameasa atu kotu no ponte Bere-Koco, ligasaun estrada nasionál Lautém mai kapitál Dili, mós ameasadu kotu.

Manatuto

Iha 04 jullu, akontese udan ho intensidade bo’ot, mosu inundasaun iha Postu Natarbora, Suku Sikone-Dilole, Aldeia Wekandia, ne’ebé estraga plantasaun to’os nian.

Iha Postu Laklubar, Suku Soibada, Aldeia moris akontese udan-boot halo rai-halai afeta bá uma 1. Iha loron ne’ebé hanesan, iha postu Saibada, akontese rai-halai, hodi afeta bá uma 1.

Ermera

Iha loron 04 jullu 2023, akontese rai-halai afeta bá komunidade nia uma 2. Kada uma iha membru família hamutuk na’in 6 (mane 3 no feto 3) no uma ida seluk hamutuk ema na’in 4 ( Mane 1 no Feto 3 ) iha Postu Ermera, Suku Potete, Aldeia Likisi.

Alende ne’e, ra-halai estraga mós uma 1 iha Postu Hatulia B, Suku Lisapat. Akontesimentu ne’ebé mak hanesan, mosu mós iha Suku Remertuto, Postu Ermera, hodi estraga uma 1.

Baucau

Iha loron 03 to’o 04 jullu, akontese rai-halai no afeta bá komunidade nia uma 2. Uma ida ho membru família hamutuk ema na’in 9 (mane 1 no feto 8 ) no uma ida seluk hamutuk ema na’in 5 (mane 2 no feto 3), iha Postu Quelicai, Suku Bualale, Aldeia Lialura, Suku Gurusa Aldeia familia afetadus (seidauk konfirma).

Tékniku operadór Bee Timor-Leste, Empreza Públika (BTL,E.P), munisípiu Viqueque identifika kanu distribuisaun bee ne’ebé kotu, iha Zona Boramatan, ne’ebé lokaliza iha suku Caraubalo, postu-administrativu Viqueque Villa, munisípiu Viqueque, hafoin udan boot loron tolu tutuir malu hahu hosi 03 to’o 05 Jullu 2023. Foto/BTL,E.P.

Viqueque

Iha loron 03-04 jullu, mosu udan-boot iha Postu Lacluta kauza inundasaun hodi sobu no estraga Ponte Sumato, ligasaun Lacluta bá Viqueque Vila. Posto Viqueque Vila, Suku Luca afeita ba uma (seidauk konfirma), iha Suku Bibi-leo afeita ba komunidade sira nia natar hamutuk hektáres 100. Suku Bahala-rawain, familia afeitadus (seidauk konfirma).

Bobonaro

Iha loron 03J jullu, akontese udan-bo’ot iha Postu Bobonaro, Suku Lour, Aldeia Olo-Olo, akontese rai-halai sobu uma 46.

Sentru Operasaun Nasionál APC mós oras-ne’e kontinua monitoriza situasaun durante oras 24 nia laran, hodi atualiza nafatin dadus no informasaun sira, nune’e kontinua partilla informasaun bá APC Munisipiu sira kona-bá kondisaun klima no previzaun tempu ne’ebé hetan ka simu hosi Meteorolojia.

Jornalista: Rogério Pereira Cárceres