Hatutan.com, (07 Juñu 2023), Díli-Ministru Justisa (MJ), Tiágo Amaral Sarmento, garante katak, iha fulan-Semtembru, tinan ne’e, kaderneta pasaporte eletrónika  to’o iha Timor-Leste. 

Lee Mós : Presiza Tempu Fulan-Sia, Visi Mitra no Thales Prodús Kaderneta Pasaporte RDTL Rihun 73

Ministru Tiágo Amaral garante ida-ne’e tanba iha fulan-Fevereiru no fulan-Marsu liubá, Governu liuhosi Ministériu Justisa halo tiha negosiasaun ho Kompañia Internasionál Thales ho Visimitra no  iha fulan-Abrí liubá, aprova tiha ona dezeñu sira bá seguransa nian.

Ministru Justisa (MJ), Tiágo Amaral Sarmento. Foto/Elio dos Santos da Costa

Prosesu sira tomak mak halo kompañia internsionál ne’e, MinistériuJjustisa hala’o tuir lei rejíme aprovizionamentu foun no prosesa dezde kedan iha fulan-Janeiru 2023. Prosesu ne’e lalais liu, fulan sia (9). Tuir loloos, prosesu ne’e lori tempu tinan rua ka tinan ida fulan ualu (8).

“Ami halo negosiasaun, ikus mai sira aseita, fulan-sia. Entaun, iha fulan-Abríl, fulan-Marsu, asina tiha kontratu, no Visi Mitra ho Thales, no iha fulan-Abríl, fulan ida de’it, asina tiha no aprova kedas dezeñu ho seguransa. Iha fulan-Agostu agora, Ministru Justisa foun, tenke halo viájen ida bá Finlándia para depois halo aprovasaun finál bá passaporte eletrónika. Aprovasaun finál ona maka, iha fulan-Setembru, empreza foin bele haruka mai,” Ministru Tiágo Amaral informa bá Hatutan.com iha Palásiu Governu, Díli, Kuarta (07/06/2023).

Ministru Tiágo dehan, prosesu ida ne’e lalais liu ona. Hahú kedan iha 2015, Kompañia Thales duni mak, fornese kaderneta pasaporte eletrónika ne’e bá Timor-Leste. Maibé, prosesu atu emite pasaporte ne’e lori tinan-rua, 2015 to’o 2017.

“Agora, iha kazu ida-ne’e, iha tinan 2023, ami rezolve ona, hein de’it, to’o fulan-Setembru. Tuir loloos, buat ne’e, rezolve tinan rua antes liubá, prosesu pasaporte ne’e, la fásil. Ne’e kompañia Thales Internasionál rasik ko’alia, ita hothotu hatene, Austrália, Indonézia, Malázia, Singapura, pasaporte eletróinika ne’e,mós, depende bá sira hotu,” Tiágo Amaral hateten.

Fó Sai Rezultadu Investigasaun

Molok ne’e, Ministru Tiágo Amaral deklara katak, iha totál kaderneta pasaporte eletrónika TL nian hamutuk rihun 150 mak deskonfia ‘lakon’ de’it iha Diresaun Jerál Servisu Rejistu Notariádu (DJSRN) nia fatin.

Hosi deskonfiansa ne’ebé mosu, ikus mai Ministru Tiágo Amaral rasik, hola pozisaun, hodi orienta Gabinéte Inspesaun no Auditória (GIA) iha ministéri  koordena ho autoridade polisial, liu-liu Policia Ciêntífica e de Investigação Criminal (PCIC) hodi bele buka tuir, saida mak kauza situasaun ne’e mosu.

“Ha’u nu’udár Ministru Justisa ne’ebé foin pose iha fulan-Marsu 2022, mai para rezolve problema. Tanba ne’e, rezultadu kona-bá averiguasaun, sei fó sai iha loron hira mai, para depois públiku hatene, tanba iha fulan-Marsu, ha’u hasai despaixu ida para depois halo averiguasaun lalais, buka tuir nia fukun, pasaporte ne’e nia problema, nia hun loloos ne’e, iha ne’ebé. Entaun, hetan ona, no lakleur publika sai,” Ministru Tiágo Amaral hateten.

Jornalista: Rogério Pereira Cárceres