Hatutan.com, (17 Maiu 2023), Díli—Partidu CNRT lidera hosi Kay Rala Xanana Gusmão submete  tiha ona keixa bá Ministériu Públiku (MP) ho entidade relevante sira molok partidu KHUNTO halo keixa kontra CNRT relasiona ho sidadaun Indonézia (WNI, sigla Indonézia) na’in-rua (2) ne’ebé kaer pasaporte RDTL ho kartaun eleitorál Timor-Leste nian atu bele partisipa iha eleisaun parlamentár, 21 fulan-Maiu 2023.

Lee Mós : KHUNTO Keixa CNRT bá Ministériu Públiku

Sidadaun Indonézia nain-2 ne’e mak deklara iha kampaña CNRT nian iha Munisípiu Bobonaro katka sira iha pasaporte RDTL ho kaer mós kartaun eleitorál Timor-Leste. Foto/Foti Hosi Facebook

Liuhosi konferénsia imprensa iha Sede Nasional Partidu CNRT iha Díli, Kuarta (17/5/2023), Prezidente Komisaun Jurizdisaun partidu CNRT, Adérito Hugo da Costa, klarifika katak,  iha kampaña partidu CNRT nian iha Munisípiu Bobonaro, iha sidadaun Indonézia na’in-rua deklara rasik katak sira  sidadaun Indonézia, kaer pasaporte Indonézia no kaer KTP (Kartu Tanda Penduduk) Indonézia, maibé kaer mós pasaporte RDTL ho kartaun eleitorál Timor-Leste.

“CNRT haree ida-ne’e no iha loron tuir mai, iha dia 13 fulan-Maiu, hale’u tuku 14:00 Otl, submete kedas keixa bá Ministériu Públiku no halo karta koñesimentu bá entidade relevante sira hanesan CNE Nasional ho Munisípiu ho mós Komandu  Jerál PNTL no Komandu PNTL Munisípiu Bobonaro,”  Adérito Hugo da Costa hateten hodi responde jornalista sira kona-bá prosesu legal ne’ebé Partidu KHUNTO foti hasoru partidu CNRT relasiona ho akuzasaun kuadru partidu CNRT nian katak partidu KHUNTO mak fasilita WNI na’in-rua ne’e hetan pasaporte RDTL ho kartaun eleitorál Timor-Leste.

Atuál membru Parlamentu Nasionál hosi Bankada CNRT ne’e klarifika katak obrigasaun partidu CNRT nian hanesan partidu boot ida kompete iha eleisaun parlamentár ne’e hakarak de’it maka eleisaun ida rezulta kualidade no kredibilidade, tanba ne’e iha kampaña  sira CNRT nian hakarak órgaun ne’ebé selebra eleisaun ne’e atu asegura katak eleisaun ne’e partisipa de’it sira ne’ebé iha elijibilidade atu tuir la’ós   ema seluk.

“Bainhira akontese kualkér infrasaun eleitorál dezde komísiu CNRT nian hahú hosi Munisípiu Manatuto iha loron 19 fulan-Abríl 2023 to’o ikus liu iha Munisípiu  Atauro, Tersa (16/5/2023),  kualkér akontesimentu ne’ebé koko atu perturba prosesu kampaña ne’e, CNRT nia ekipa  adianta kedas bá órgaun eleitorál sira, liuliu imediatamente halo atuasaun, inklui kazu ne’ebé akontese iha Maliana,” Adérito Hugo hateten.

Iha fatin hanesan Sekretáriu Jerál partidu CNRT, Francisco Kalbuadi Lay,  hateten partidu CNRT prontu kolabora ho justisa no kontinua hein desizaun saida de’it mak parte kompetente sira deside relasiona ho kazu WNI na’in-rua iha pasaporte RDTL ho mós iha kartaun eleitorál Timor-Leste nian.

“Ita hotu hein de’it tanba kazu ne’e entrega ona bá autoridade justisa. Bá CNRT buat boot liu no aas liu iha prosesu kampaña to’o eleisaun ne’e mak tenke rezulta kualidade eleisaun parlamentár, katak onestu no justu hodi fó povu nia direitu tomak atu vota ho konsiénsia no partidu ne’ebé mak povu hili, ita hotu tenke respeitu. Partidu CNRT respeita desizaun povu nian no desizaun saida de’it mak povu atu deside iha eleisaun parlamentár, 21 fulan-Maiu ne’e,” Francisco Kalbuadi Lay esplika.  

Jornalista : Vito Salvadór