Hatutan.com, (14 Maiu 2023), Díli—Konfrontu hodi hamate vítima Bernadino Ximenes Brites tinan 20,  hakanek FAG (20) ho SLP (19) iha área Lurumata, Díli,  Polísia Nasionál Timor-Leste (PNTL) liu hosi servisu sekreta Makikit assegura joven mane na’in-hitu.

PNTL assegura joven na’in-hitu ne’ebé deskonfia involve iha kazu omesidiu ba vítima Bernadino Ximenes Brites tinan 20, hakanek FAG (20) ho SLP (19) iha área Lurumata, aldeia 03, Suku Fatuhada, Postu-Administraivu Dom-Aleixo, Munisipiu Dili, Sábadu (13/05/2023). Foto/PNTL.

Joven-na’in hitu ne’e asseguradu tanba Polísia konsidera perturba órden publika hanesan tuda-malu iha aldeia 03, Suku Fatuhada, Postu-Administraivu Dom-Aleixo, Munisipiu Dili, Sábadu (13/05/2023).

Lee Mós:MP Promove Kríme Tolu bá Arguidu Na’in-Haat Deskonfia Oho Dodi Adão de Jesus

Hafoin assegura joven na’in-hitu ne’e, ekipa servisu sekreta Makikit dezenvolve kazu ne’e hosi vítima FAP (20) ne’ebé hetan tá iha parte ulun, nu’udár mós sasin okulares deklara tan suspeitu prinsipál balun nia naran.

“Entaun ekipa halo kedan koordenasaun ho ekipa konjunta ba buka-tuir suspeitu sira ne’ebé vítima deklara ona,” Hatutan.com sita komunikadu hosi PNTL.

Ekipa konjunta ne’e lidera hosi Servisu Informasaun Polisia Nasionál (SIPN), Makikit, Eskuadra PNTL Dom Aleixo, SNI Servisu Nasional Intelijensia(SNI), Unidade Falintil (UF), Servisu Informasaun Militar (SIM) no MD1 hosi instituisaun FALINTIL-Forsa Defeza Timor-Leste(F-FDTL) inklui Forsa Rezerva.

Ekipa konjunta iha oras 23:35, sai hosi Lurumata hodi buka-tuir suspeitu ida ho naran DM tinan 32, hela iha Luru-Mata no kaptura iha área Fomentu Ponte 3.

DM rekuza hodi hatudu tán nia maluk seluk, nune’e ekipa mós ba foti tán HG tinan 32 inklui MSC (30), FL (28) no JS (41) iha fali área Kampung Baru.

Bainhira ekipa ba foti HG konsege halai, nune’e ekipa duni-tuir hodi kaptura iha mota laran no nia deklara katak, foin fila hosi servisu la hatene buat ida, tanba akompaña halo kobertura ba atividade kampaña partidu politiku balun iha Munisipiu Baucau.

JS mos deklara katak nia rai hela tudik ida iha uma kalén leten, nune’e ekipa halo buska ba suspeitu sira nia uma no konsege hetan evidénsia sasan kro’at balun hanesan tudik komandu 1 ho maubeka ida iha JS nia uma leten, iha fali JS nia viziñ hetan mós katana 1 iha armáriu okos, maubeka 1 iha meza leten no maubeka ida iha bidon doku sanyo taka metin hela.

Sira ne’ebé ekipa servisu lori mai ne’e tanba sira nia naran vitima temi, entaun ekipa halo identifikasaun ba sira nu’udár meius ida hodi deskobre informasaun ba autoridade seguransa ligadu ho autór prinsipál ne’ebé komete kazu omesidiu grave hodi hakotu ona ema nia vida.

Alem de ne’e, sira mós hela hotu iha área Luru-Mata, aldeia 03,Suku Fatuhada besik malu ho vitima na’in tolu ne’e.

Hafoin ekipa investigadór hosi Eskuadra PNTL Dom-Aleixo, konklui identifikasaun halo kedan auto entrega mai Komandu Munisipiu Dili atu kontinua halo investigasaun hodi hatene kle’an liu motivu hosi akontesimentu ne’e.

Jornalista: Rogério Pereira Cárceres