Hatutan.com, (06 Maiu 2023), Díli-Polísia Nasionál Timor-Leste (PNTL) Munisípiu Díli ho Ekipa Patrullamentu Eskuadra Na’in-Feto,  Sábadu (06/05/2023), kaptura ona suspeitu na’in-haat, tanba deskonfia oho vítima Dodi Adão de Jesus, besik estrada ibun Universidade Dili (UNDIL), área Kintál-Boot, Díli.

Lee Mós : Kazu Omisídiu iha Delta-Elemloi, Komisaun B Husu Buka Tuir Lalais Autór

Informasaun ne’ebé Hatutan.com asesu hosi ekipa servisu sekreta sira katak, suspeitu na’in-haat (4) ho inisial RdCB,  suspeitu EpdS, uspeitu JPdS oríjen hosi Postu Administrativu Na’in-Feto, Suku Santa Cruz, Aldeia 12 Novembru, hela iha área Kintál-Boot no suspeitu APLA hosi Aldeia Caidawalari, Suku Makadiki, Postu Administrativu Uatulari, Munisípiu Viqueque, hela-fatin Kintál-Boot.

Matebian Dodi Adão de Jesus. Foto/Espesiál

Kronolójia kazu insidente omesídiu ne’e akontese iha Sábadu (06/05/2023), haleu tuku 01:00, madrugada Otl, iha área Kintál-Boot. Fofoun, mosu uluk konfrontasaun entre juventude sira hosi Aldeia 07 Setembru ho  Aldeia 04 Setembru.

Iha  konfrontu ka tuda-malu ne’e, suspeitu EPdS, ho tudik ne’ebé nia lori kedan hosi ninia uma, konsege sona dala-ida iha vítima Dodi nia hirus-matan. Hafoin, suspeitu APLA, foti kanuru suru rai-henek nian, baku iha vítima nia kesu, rezulta vítima nia kesu kanek no naklés.

La to’o de’it iha ne’e, suspeitu APLA mós foti kanuru hodi taa tán iha vítima nia tilun sorin loos, to’o rezulta mós kanek no naklés. Hosi aktu asasinatu hosi suspeitu sira-ne’e, rezulta vítima monu tun bá rai no mate kedas iha fatin.

Hafoin vítima Dodi monu bá rai latan ho raan, suspeitu sira mós hakat bá buka tuir tán sidadaun mane ida seluk ho naran Caetano Soares, tanba nu’udár sasin bá Dodi nia mate. Suspeitu sira konsege hetan Caetano, no suspeitu JPdS foti kanuru suru rai-henek nian, taa iha vítima ninia ulun, maibé, la kona, tanba Caetano konsege uza ninia liman sorin loos hodi satan ka tahan, maibé, rezulta mós kanek no ran.

La’ós ne’e de’it, suspeitu EPdS foti kanuru  duni tuir vítima Caetano, maibé la konsege, tanba vítima halai sees hodi salva aan. Caetano ne’ebé sente isin-lolon kanek no ran ona ne’e, halai liu kedan bá Ospitál hodi halo tratamentu no suku pontu 6.

PNTL konsege to’o iha lokál  kríme, maibé suspeitu sira halai sees ona. Suspeitu sira halai soe hela evidénsia sira mak hanesan tudik ida (1), kanuru suru rai-henek nian  ida (1), ai-bubur ida (1), no ai ho modelu satick ida (1). Polísia sira halo kedan apreensaun bá evidénsia hiaka ne’e, hodi lori bá Eskuadra Na’in-Feto, Díli.

Iha madrugada ne’e kedan, PNTL mós koleta ka rekolla informasaun hosi testamuña sira, no ekipa Servisu Sekreta sira Komandu PNTL Munisípiu Dili, no Ekipa Patrullamentu Eskuadra Nain-Feto, konsege identifika suspeitu na’in-haat (4) ne’e nia paradeir, no halo kedan kapturasaun.

Lokal akontesimentu iha estada UNDIL nian iha área Kintal-Boot, Munisípiu Díli. Foto/Rogério Pereira Cárceres

Suspeitu na’in-haat (4) ninia kazu ne’e, PNTL liuhosi Investigasaun Kriminál, rejista ona ho númeru prosesu ka NUC 0089/23.DNIF. Oras ne’e dadaun, suspeitu sira detein hela iha sela detensaun Eskuadra Na’in-Feto, hodi hein prosesu investigasaun kontinua.

Matebian Dodi Adão de Jesus, moris iha loron 03, fulan-Janeiru tinan 2005. Matebian hela iha Aldeia 12 Novembru, Suku Santa Cruz, Postu Administrativu Na’in-Feto, Munisípiu Díli. Oan hosi Domingas Lopes Soares ho Daniel Adão de Jesus. Matebian hakotu iis ho idade tinan 18.

Oras ne’e, matebian nia isin-mate tau hela iha sala mortuáriu Ospitál Nasionál Guido Valadáres (HNGV), Bidau-Dili, hodi hein desizaun família atu submete bá prosesu autópsia.

Jornalista: Rogério Pereira Cárceres