Hatutan.com, (05 Maiu 2023), Díli- Partidu Kmanek Haburas Unidade Nasionál Timoroan (KHUNTO) introdús   programa foun atu   estabelese kampu traballu bá Timoroan sira ne’ebé ho situasaun analfabetu ho saláriu mínimu.

Lee Mós : KHUNTO Promete Hadi’a Infraestrutura Bázika Atu Povu Moris ho Dignu

Prezidente Partidu KHUNTO, Armanda Berta dos Santos. Foto/P.KHUNTO

Prezidente Partidu KHUNTO, Armanda Berta dos Santos, hateten programa foun ne’ebé KHUNTO hakarak introdús hodi diskute mak kriasaun empregu bá Timoroan hirak ne’ebé analfabetu.

Vise Primeira-Ministra VIII Governu Konstitusionál ne’e haktuir  sei halo rekrutamentu bá Timoroan sira iha kada aldeia ema na’in-10, hodi fó sira-nia saláriu tuir saláriu mínimu ne’ebé Governu iha. Traballadór sira ne’ebé sei rekruta atu halo serbisu hodi hadi’a, hamoos, no kuida estrada públiku to’o iha aldeia sira.

“KHUNTO nia programa foun mak kriasaun empregu bá Timoroan ne’ebé analfabetu atu bele servisu iha estrada públiku sira,” Prezidente KHUNTO Armanda Berta dos Santos, hateten iha kampaña ne’ebé hala’o iha Kampu Futeból Postu Administrativu Maliana, Munisípiu Bobonaro, Kinta (04/05/2023).

Prezidente Partidu KHUNTO ne’e hatutan, KHUNTO nia programa sira bá iha IX Governu Konstitusionál ne’ebé sei mai mak sempre aliña-an iha Planu Estratéjiku Dezenvolvimentu Nasionál (PEDN) 2011 – 2030. Tamba PEDN ne’e nu’udar matadalan  bá partidu hotu ne’ebé durante ne’e hola parte iha Governasaun dezde IV Governu Konstitusionál too Governasaun atuál.

Kuadru partidu KHUNTO Munisípiu Bobonaro, Pedro dos Reis atuál Ministru Agrikultura no Peska (MAP) hateten bainhira hetan konfiansa hosi povu, KHUNTO sei kontinua tau-matan ba irrigasaun no setór agrikultura iha Bobonaro.

Nia afirma Governu da-VIII liu husi Ministériu Agrikultura no Peska (MAP), ne’ebé KHUNTO asume responsabilidade hala’o tiha ona ida-ne’e, maiske durasaun tempu ukun nian la to’o tinan-tolu (3).

Governu la bele hadi’a hotu kedas irrigasaun tomak iha Bobonaro ne’e, tan de’it pandemia COVID-19 ataka mundu, inklui Timor-Leste, no ikus-mai aumenta tan ho inundasaun boot iha inísiu tinan 2021, ne’ebé afeta ba ema hotu nia moris.

“Hanesan Governante iha setór Agrikultura no Peska ne’ebé nu’udar Bobonaro-oan, konsege hadi’a irrigasaun barak iha territóriu Timor-Leste, inklui Munisípiu Bobonaro, hodi hasa’e rendimentu ekonomia povu nian,” Pedro dos Reis haktuir.

Munisípiu Bobonaro rejista eleitór hamutuk 72,537 kompostu hosi mane 37,335 (51%) no feto 35,202 (49%).

Kampaña partidu KHUNTO iha Munisípiu Bobonaro hetan seguransa másimu husi Polísia Nasionál Timor-Leste (PNTL) no hetan mos observasaun direita husi órgaun eleitorál Comissão Nasionál das Eleições (CNE) no Provedoria Direitus Umanus no Justisa (PDHJ).

Jornalista: Vito Salvadór