Hatutan.com, (30 Abríl 2023), Díli—Prezidénsia Repúblika entrega hikas oan ki’ak na’in tolu bá  autoridade lokál iha aldeia Mabelis, suku Lebers, Postu Administrativu Bobonaro, munisípiu Bobonaro, 30 Abríl 2023.

Prezidénsia Repúblika entrega hikas oan ki’ak na’in-tolu bá autoridade lokál iha aldeia Mabelis, suku Lebers, Postu Administrativu Bobonaro, munisípiu Bobonaro, 30 Abríl 2023. Foto/Média PR.

Oan ki’ak na’in tolu ne’e entrega direta hosi Asesór Sosiedade Sivíl no Apoiu Sosiál hosi Prezidénsia Repúblika (SSAS), Quintiliano Moniz, hafoin identifika iha loron 06 fulan Abríl tinan ne’e no lori mai hela loron balun iha Díli.

Lee Mós: Portadór Defisiénsia 150 Iha Bobonaro Hetan Apoiu Hosi Prezidénsia Repúblika

“Prossesu hetan alin na’in-tolu ne’e mai hosi ekipa autoriedade lokál no funsionáriu SSAS, halo sira nia vídeo no publika iha média sosiál ikus mai Prezidente Repúlika haree, sente triste tebes ho kondisaun moris sira na’in-tolu nian.

“Prezidente Repúblika haruka kedan ami atu bele lori alin na’in-tolu ne’e ba Dili hodi buka meiu atu apoia sira. Loloos ne’e Xefe Estadu mak hakarak lori mai rasik hodi haree kondisaun reál maibé tanbá okupadu nune’e kansela, hodi delega ami mak lorin hela mai,” Hatutan.com sita deklarasaun Quintiliano Moniz iha komunikadu.

Quntiliano Moniz informa, Xefe Estadu preokupa ho sira nia futuru, tanba ne’e hakarak oan-ki’ak na’in-tolu ne’e assesu ba edukasaun no harii kios ruma hodi hakbi’it sira nia família.

Xefe Estadu buka meius atu ajuda sira na’in-tolu hodi hela iha Dili, liu-liu haree kona-bá sira nia edukasaun, maibé infelizmente bin hosi labarik na’in-rua ne’e lakohi.

Tanba rejeita hela iha Díli, Prezidénsia Repúblika buka-dalan atu ko’alia ho Konventu Madre sira nian iha Postu Administrativu Lolotoe, hodi akomoda oan-ki’ak na’in-tolu ne’e.

“Prezidente Repúblika preokupa liu mak sira nia uma, maibé liu-liu sira nia futuru. Sira tenke eskola. Ne’e Prezidente Repúblika fó hela mensájem ba ha’u katak, lori sira ba no koordena ho madre sira hodi ba hela no tenke eskola ne’ebé orsida sai hosi ne’e ba halo koordenasaun ho madre sira iha Lolotoe,” Quintiliano haktuir.

Madalena Moniz tinan 14, Cesaltina Moniz tinan 8 no Rofina Moniz tinan 4, nia inan-aman mate iha tinan 2018 no durante ne’e sira moris mesak no laiha ema ida mak tau-matan ba sira.

Ekipa Prezidénsia Repúblika mós entrega sasan uma-laran  no dapur nian bá oan-ki’ak na’in-tolu no mós distribui apoiu nesesidade bázika ba uma-ka’in 60 hosi aldeia Leberetas, Butuk, Mebelis, Holsa, Taz, Holbese, Suku Leber, Postu Administrativu Bobonaro.

Xefe Suku Leber, Joanico da Silva agredese ba inisiativa Prezidente Repúblika “Ohin loron espesiál ida mai ami suku Leber, tanbá hetan Prezidente Repúblika kuidadu ona labarik na’in tolu besik fulan ida iha Dili. Tambá inan-aman la iha. Durante ne’e hela fatin grave, la iha família ida tau matan. Ami agradese bo’ot ba Xefe Estadu Horta, ne’ebé halo mudansa ba labarik na’in-tolu ne’e,” nia hateten.

Jornalista: Vito Salvadór