Hatutan.com,  (26 Abríl 2023), Ainaro- Partidu Demokrátiku (PD), Kuarta (26/4/2023), hala’o mini kampaña  iha Postu Administrativu Hatu-Builico, Munisípiu Ainaro, hodi transmite programa prinsipál Partidu Demokrátiku nian bá povu sira iha Hatu-Builico.

Lee Mós : PD Ukun Hakarak Fó Kréditu Bá Estudante Sira no Hasa’e Saláriu Mínimu bá $200.00

Mini kampaña PD iha Postu Administrativu Hatu-Builico, Munisípiu Ainaro, Kuarta (26/4/2023). Foto/Joaquim de Fátima Coutinho

Iha mini kampaña ne’e, Sekretáriu Jerál Partidu Demokrátiku, António da Conceição “Kalohan”, afirma katak povu nia destinu la’ós de’it konta istória, maibé povu presiza dezenvolvimentu, liberdade no moris ho dignu.

Iha abertura mini kampaña ne’e,  António da Conceição “Kalohan”, hakru’uk husu tulun no bensan bá Nai-Feto Ramelau atu fó mahan nafatin bá Partidu Demokrátiku ho nia emar sira  atu kontinua dezenvolve rai ida-ne’e tuir obra eroi sira-nian.

“Povu nia destinu la’ós maka istória ne’ebé maka ida rua konta bá rai Timor tomak bá nia mesak. Povu nia destinu maka sira no ita nia liberdade, ita nia moris di’ak. Povu nia destinu maka edukasaun bá ita-nia oan sira, ida-ne’e maka sentidu husi votu ne’ebé maka imi fó tinan lima  dala ida atu imi dehan bá sira ne’ebé maka ukun, hodi dehan katak ami husu deskulpa maibé ami tenke kurije  ita-boot sira katak tinan lima kotuk bá ami fó ho hakarak ida katak Hatu-Builico tenke iha dalan ida bá ami atu la’o atu ami sira ne’ebé maka moras karik labele hela atu mate de’it iha fatin, maibé tenke bá to’o ospitál Referral Maubisse hodi hetan tratamentu.  Ida-ne’e maka objetivu hosi votu,” Sekretáriu Jerál PD ne’e hateten.

Bainhira povu Timor tomak, liuliu povu Hatu-Builico fó fiar bá Partidu Demokrátiku iha eleisaun parlamentár, 21 fulan-Maiu 2023, Partidu Demokrátiku kompromete sei hakotu korrente konflitu iha rai ida-ne’e tanba la’ós ona tempu atu haksesuk malu beibeik iha rai ida-ne’e.

Mini kampaña PD iha Postu Administrativu Hatu-Builico, Munisípiu Ainaro, Kuarta (26/4/2023). Foto/Joaquim de Fátima Coutinho

“Partidu Demokrátiku nia promesa ida maka ida ne’e hakotu korrente konflitu iha rai ida-ne’e. Ita labele haksesuk malu beibeik atu hatuur deit ema ida rua bá naran boot iha rai ida-ne’e. Povu maka deside destinu rai-ida ne’e nian iha 30 Agostu 1999 maka vota  bá Concelho Nacional Resistencia Timor (CNRT, katak independénsia. La iha ema ida mesak mak vota ba independénsia,” António da Conceição “Kalohan ” tenik.

Biban ida ne’e mós Vise Presidente Partido Demokrátiku (PD), Samuel Mendonça  bá militante no povu Hatu-Builico kompromete katak sei kontínua hadi’a estrada bá povu iha área remota sira atu bele lori dezenvolvimentu bá povu tuir lema Partidu Demokrátiku nian katak “Dezenvolvimentu Hahú Hosi Baze”.

“Hatu-Builico, ita kontínua nafatin, aban-bainrua ita tenke halo buat ruma di’ak bá rai ida-ne’e, tenke hadi’a estrada ne’ebé maka di’ak duni. Ami hatene hela katak ita boot sira durante tinan barak  hetan sofrimentu kona-bá estrada, ita tenke halo, maibé imi la hili ami ida, imi hili maka partidu sira ne’ebé fahe maka hahán, imi hili maka partidu sira ne’ebé halo maka promete falsu,” Samuel Mendonça   hateten.

Nia husu bá povu Hatu-Builico atu hili no eskolla partidu ne’ebé maka ho vizaun di’ak hodi dezenvolve rai ida ne’e, no halo tuir kompromisu ne’ebé promete ona bá povu liu husi kampaña eleitorál.

Númeru eleitór iha Munisípiu Ainaro ne’ebé rejistu iha baze dadus  Sekretariadu Tekkniku Administrasaun Eleitorál (STAE) hamutuk ema na’in-47,912, kompostu hosi eleitór mane 24775 (52%) no feto 23137 (48%).

Mini kampaña Partidu Demokrátiku iha Postu Hato-Builco,  Munisípiu Ainaro la’o ho di’ak to remata no hetan seguransa hosi PNTL Eskuadra Hatu-Builico no supervizaun husi Ofisial Supervizaun Eleitorál CNE.

Kontribuidór : Moises da Silva Magno