Hatutan.com, (05 Abríl 2023), Díli—Reuniaun Konsellu Ministrus (KM) iha Kuarta, 05 Abríl 2023 aprova ona projetu Dekretu-Lei, ne’ebé aprezenta hosi Ministru Defeza (MD), Filomino da Paixão de Jesus, kona-bá Estrutura orgánika Autoridade Marítima Nasionál (AMN).

Diploma ida-ne’e define iha ámbitu Sistema Autoridade Marítima (SAM), estrutura foun, organizasaun, funsionamentu no kompeténsia Autoridade Marítima Nasionál (AMN).

Lee Mós: Konsellu Ministru Transforma Komisaun Nasionál Aprovizionamentu bá Institutu Públiku

“Ho ida ne’e, loke dalan atu Autoridade Marítima Nasionál ne’e bele hahú funsiona no pasu tuir-mai, Konsellu Ministru mós sei aprova inisiativas regulamentáres sira, atu Autoridade Marítima Servisu ho di’ak, prozete ita-ninia espasu marítimu ne’ebé hanesan parte integrante ida hosi ita-nia soberania nasionál,” Portavós Governu, Ministru Prezidénsia Konsellu Ministru, Fidelis Manuel Leite Magalhães hateten hafoin sorumutu KM ordináriu iha Palásiu Governu-Díli.

AMN ne’e kontinua sai órgaun ne’ebé diresiona no koordena operasaun sira iha tasi, ho ámbitu nasionál, hodi ezekuta iha kuadru SAM nian, tuir instrusaun sira ne’ebé define hosi Ministru Defeza. Xefe Estadu-Maiór Jenerál FALINTIL – Forsa Defeza Timor-Leste maka AMN.

Alterasaun prinsipál no boot ne’ebé realiza liga ho diferente estrutura ida, kompostu hosi servisu oin-oin.

AMN integra hosi Diresaun Autoridade Marítima (DAM) ho ninia servisu sentrál no dezkonsentradu, no Konsellu Konsultivu AMN (CCA).

AMN hetan apoiu hosi gabinete apoiu direitu, konstitui hosi militár no sivíl ne’ebé xefia hosi ofisiál superiór ho ninia kompozisaun, atribuisaun no funsionamentu aprova tuir diploma ministeriál hosi membru governu ne’ebé responsável ba área defeza.

Jornalista: Rogério Pereira Cárceres