Hatutan.com, (28 Marsu 2023), Díli—Autoridade lokál sira iha Díli laran hato’o apresiasaun no agradese  bá Xefe Estadu ne’ebé haklaken ona fenómenu eklipse solar ka loro-matan nakukun hodi ajuda povu la bele pániku.

 Tuir sientista sira  ka matenek na’in sira iha mundu fó sai katak iha loron 20 fulan-Abríl 2023, sei akontese fenómenu eklipse solar ka loro-matan nakukun durante oras balun. Nune’e, Prezidente Repúblika (PR), José Ramos-Horta, hola inisiativa hodi halo alerta no sosializasaun beibeik bá povu tomak iha territóriu Timor-Leste atu la bele pániku no ta’uk ho fenómena ida-ne’e.

Xefe Suku Caicoli, Hipolito Marques Sarmento. Foto/Lazaro Pereira Quef

Iha diskursu balun, inklui mensajen sira liuhosi órgaun komunikasaun sosiál sira ne’ebé eziste iha Timo-Leste, Prezidente Repúblika, José Ramos-Horta, kontinua halo sosializasaun kona-bá fenómenu eklipse solar ne’ebé sempre akontese dala-ida iha tinan 100 nia laran.

“Ami autoridade lokál sira simu instrusaun direta hosi Prezidente Repúblika liuhosi sorumutuk ne’ebé konsentra iha Palásiu Prezidensiál iha fulan-Fevereiru 2023, ami hetan esplikasaun sientífiku hosi Xefe Estadu hodi haklaken hikas bá ami nia komunidade iha ami ida-idak nia suku laran atu fó hatene bá komunidade kona-bá fenómenu ida-ne’e. Ami nia komunidade informadu ona no sei la hakfodak ho fenómenu loro-matan nakukun ne’e,” Xefe Suku Caicoli, Hipolito Marques Sarmento hateten bá Hatutan.com iha nia knar fatin, Tersa (28/3/2023).  

Xefe Suku sira iha territóriu Timor-Leste informadu simu mós knaar hosi Xefe Estadu ho Governu atu sensibiliza fenómenu eklipse solar  ne’e bá komunidade iha ida-idak nia suku laran no rona mós katak Governu sei fahe ókulu bá komunidade sira atu bele taka hodi asiste fenómenu ida-ne’e  

“Espera katak kompromisu atu fahe ókulu bá povu tomak ne’e bele fahe hanesan bá hotu-hotu. La bele fahe bá balun de’it no balun la hetan,” Xefe Suku Hipolito Marques Sarmento hateten.

Xefe Suku Bairru-Pité, João Batista da Costa Belo. Foto/Lazaro Pereira Quef

Nia sujere atu fó prioridade liubá labarik sira bele hetan ókulu ne’e, tanba labarik sira la komprende sira bele  hateke no pániku iha fenómenu loro-matan nakukun ne’e. tanba rona dehan, bainhira loro-matan nakukun la bele hateke bá leten no hakarak hateke karik tenke uza ókulu espesífiku ne’ebé Governu atu fahe.  

Xefe Suku Bairru-Pité, João Batista da Costa Belo, fenómena loro-matan nakukun ka eklipse solar ne’ebé atu akontese ne’e sei la lori pániku bá komunidade tanba sira informadu liuhosi mensajen sira Estadu nian no informasaun pertinente sira ne’ebé autoridade lokál sira partilla ho sira nia komunidade iha aldeia laran no bairru laran sira.

“Prezidente  Repúblika fó sai ona saida mak atu akontese no ami autoridade lokál sira mós fó tutan tan informasaun ne’e bá ami nia komunidade sira hotu para atensaun tamba loro-matan ne’e atu nakukun ka ita bolu eklipse solar. Ha’u hanoin komunidade sira mós sei la pániku tanba sira komprende ona,” Xefe João Batista da Costa Belo  tenik.

Xefe Suku Motael, Luis Antonio Candido Viegas. Foto/Lazaro Pereira Quef

Xefe Suku Motael, Luis Antonio Candido Viegas, hateten, sira-nia parte hahú hosi Xefe Suku, Xefe Aldeia no Konsellu Suku sira halo sosializasaun to’o komunidade sira informadu di’ak tebes bá fenómenu ida-ne’e. tanba ne’e, komunidade sira sei la pániku.

“Komunidade sira mós akompaña hosi televizaun, mídia online sira ho mídia  sosiál kona-bá mensajen Prezidente Repúblika nian ne’e. Ho nune’e, ami fiar katak komunidade preparadu ona atu asiste loro-matan nakukun ne’ebé sei akontese iha loron 20 fulan-Abríl, tinan ne’e,” Xefe Suku Luis Antonio Candido Viegas hateten.

Jornalista Estajiariu : Dirce Sandra daCostaGomes/Lazaro Pereira Quef