Hatutan.com, (17 Marsu 2023), Díli–Estadus Unidus nia Enkarregadu Negósiu, Tom Daley hamutuk ho Vise Prezidente Kámara Komérsiu no Indústria Timor-Leste (CCI-TL), Herguilina Alves, ensera programa akademia bá Feto Emprendedora (AWE, sigla ingles) ne’ebé apoia feto Timoroan hamutuk 45 hodi hadi’ak no haforsa tan sira-nia abilidade negósiu no dezenvolve planu negósiu liuhosi Estadus Unidus nia estadu-ba-arte nia módulu formasaun negósiu “Dream Builder ka Badain bá Mehi” ne’ebé dezenvolve hosi Universidade Estadu Arizona.

Lee Mós : Xefe Estadu Agradese EUA Ne’ebé Oferese Millaun $4 bá Hadi’a Seguransa Ai-han TL

Enkarregadu Negósiu Embaixada EUA, Tom Daley. Foto/Hatutan.com

Hola parte iha serimónia enserramentu ne’e, feto emprendedora na’in tolu hetan apoia fundu finanseiru hodi haburas sira nia negósiu ne’ebé poténsia sira.

“Programa ida ne’e fó dalan bá emprendedora negósiu poténsia sira hodi dezenvolve sira-nia idea no apoia malu ho espasu ne’ebé seguru ba kreximentu pesoál,” Enkarregadu Negósiu Estadus Unidus, Tom Daley hateten iha ninia diskursu durante serimónia enserramentu ne’e.

“Estadus Unidus komprometidu bá apoia feto Timoroan sira hodi lidera sira nia ekonomia iha sira-nia liman laran hodi lidera negósiu hirak ne’ebé mak sei muda ema nia moris bá di’ak liután no hasa’e prosperidade ekonomia bá povu Timoroan,” Tom Daley hateten iha komunikadu imprensa ne’ebé Hatutan.com asesu, Sesta (17/3/2023).

 Ho apoia finanseiru $45,000, Estadus Unidus apoia ona CCI-TL hodi implementa Akademia bá Feto Emprendedora sira, inklui estabelese sentru bá negósiu ida ho naran business hub. Programa formasaun ida-ne’e mak períodu ba dala-rua tuituir malu ne’ebé Estadus Unidus apoia ona bá programa Akademia ba Feto Emprendedora ne’e, ne’ebé ekonomikamente involve feto vulneravel, feto portadores sira, no membru komunidade LGBTQI.

Programa ida-ne’e nia etapa dahuluk inklui feto emprendedora foin-sa’e sira hamutuk 30 no formasaun etapa dahuluk ramata ona iha inísiu tinan 2022.

Jornalista Estajiária :  Dirce Sandra da Costa Gomes