Hatutan.com, (24 Fevereiru 2023), Díli- Komisaun Anti Korrupsaun (CAC, sigla portugés) kontinua halo investigasaun, rekolla evidénsia no bolu parte sira bá presta deklarasaun bá kazu projetu instalasaun Set-top Box Rádiu Televizaun Timor-Leste, Empreza Públiku (RTTL,E.P) hodi kompleta prosesu tomak molok submete prosesu  bá Ministériu Públiku (MP).

Lee Mós : MAPKOMS Selebra Kontratu ho Kompañia Global Citra Tama Harii Tore Tolu ho Valor Millaun $1-resin

Komisáriu CAC, Sérgio de Jesus Fernandes da Costa Hornai, kona-bá prosesu kontinuasaun investigasaun bá projetu instalasaun Set-top Box RTTL.EP CAC rona ona ema lubuk oan ida, no rekolla ona informasaun sira no kazu Set-top Box RTTL. E.P konserteza to’o nia prazu CAC sei submete ba iha Ministériu Públiku no Ministériu Públiku sei halo nia akuzasaun, hodi nune’e, se iha duni razaun para atu akuza sei akuza no se laiha razaun tenke arkiva.

Komisáriu CAC, Sérgio de Jesus Fernandes da Costa Hornai. Foto/Helio dos Santos da Costa

“Ema lubuk oan ida ne’ebé ita konsidera hanesan parte interveniente iha prosesu investigasaun bá kazu projetu instalasaun Set-top Box RTTL. E.P nian CAC bolu tamba konsidera atu rona  sira nia deklarasaun bá depoimentu hodi lori prosesu ne’e bá to’o nia rohan,” Komisáriu CAC Sérgio de Jesus Fernandes da Costa Hornai, responde jornalista sira iha ámbitu serimónia tinan-13 ezisténsia CAC ne’ebé hala’o iha Salaun Lalini Lariguto, Komisaun Nasionál bá Eleisaun (CNE, sigla portugés), Díli, Sesta (24/2/2023).

Komisáriu Sérgio Hornai  subliña, durante ne’e CAC halo nia servisu bazeia deit ba kódigu konduta ne’ebé iha no kona-bá kazu Set-top Box RTTL. E.P CAC kontinua halao nia servisu ho profesionál no imparsial atu hatur justisa iha nia fatin.

Kona-bá relasaun saida mak CAC notifika mós Ministru Asuntu Parlamentar no Komunikasaun Sosiál (MAPKOMS),, Francisco Martins da Costa Pereira Jerónimo nia oan-mane hodi presta mós deklarasaun hanesan testemuña iha CAC, Komisáriu Sérgio Hornai afirma katak iha informasaun balun ne’ebé nesesáriu tenke iha kruza bá se-se de’it karik iha relasionamentu bá buat ruma tenke halo notifikasaun para halo averiguasaun sira, halo dilijensia sira para atu bele rona.

Maske nune’e, Komisáriu CAC ne’e  esklarese katak, prezensa MAPKOMS nia oan-mane hodi halo prestasaun iha CAC,iha relasaun ho kazu Set-top Box RTTL. E.P ou lae nia parte lakoi halo uluk konkluzaun. 

Lee Mós : Kazu Instalasaun Set-Top Box RTTL,E.P, CAC Notifika MAPKOMS Nia Oan-mane Hanesan Sasin

“Há’u la halo konkluzaun tamba konserteza ita hakarak rona para atu hatene lolos fontes de informasaun sira iha verasidade ka lae,”  Komisáriu Sérgio Hornai hateten.

CAC Konstitui MAPKOMS Hanesan Arguido

Bazeia bá prova investigasaun bá kazu projetu instalasaun  Set-Top box Rádiu Televizaun Timor Leste, Empreza Públika (RTTL,E.P), Komisaun Anti Korrupsaun (CAC, sigla portugés) konstitui Ministru Asuntu Parlamentár no Komunikasaun Sosiál (MAPKOMS), Francisco  Martins da Costa Pereira Jerónimo hosi suspeitu bá arguido.

CAC uza nia kompeténsia própriu  konstitui Ministru Francisco  Martins da Costa Pereira Jerónimo  nu’udár arguido ho baze Kódigu Prosesu Penál (KPP) artigu Artigu 91 (Notifikasaun), alínea 3  ne’ebé hateten, funsionáriu judisiál, ajente polisiál  ka autoridade seluk ne’ebé lei fó kompeténsia maka halo notifikasaun tuir despaxu ka ho orden ofisioza hosi sekretaria judisiál. 

Nune’e, iha Kuarta, 04 fulan-Janeiru 2023,  hale’u tuku 09.04 Otl,  Ministru Francisco Martins da Costa Pereira Jerónimo, marka prezensa iha edifísiu CAC hodi hatán bá notifikasaun hosi sesaun investigadór CAC nian para presta deklarasaun relasiona ho kazu projetu instalasaun Set-top Box RTTL,E.P ne’ebé lori prejuízu bá Estadu ho montante orsamentu $7,680.00.

Lee Mós : Kazu Projetu Instalasaun Set-top Box RTTL,E.P, Ministru MAPKOMS Konstitui Bá Arguido

Jornalista: Vito Salvadór