Hatutan.com, (16 Fevereiru 2023), Díli-Tribunál Distritál Díli (TDD) liuhosi juis titular Ivan Suritai, deside adia julgamentu bá prosesu kazu abuzu seksuál hasoru minoridade ne’ebé deskonfia envolve hosi arguidu ho inisiál JC.

Polísia Nasionál Timor Leste (PNTL) akompaña arguido JC (uza faru detidu) partisipa audiénsia primeira interrogatóriu iha TDD, Kinta (16/2/2023). Foto/Elio dos Santos da Costa

Audiénsia primeira interrogatóriu iha TDD,  Kinta (16/2/2023), Ministériu Públiku (MP) liuhosi Prokuradór Renato Bere-Naha, husu bá Tribunál Distritál (TDD) atu aplika medida koasaun prizaun preventiva bá arguidu JC no parte Defeza Miguel Acáçio Faria, solisita bá Tribunál atu tetu desizaun tuir de’it saida mak Juiz sira haree bá kazu ne’ebé arguidu komete.

Hafoin rona parte sira,  juis titular  Ivan Suritai deside adia leitura despaixu ikus nian bá loron Sesta, 17 fulan-Fevereiru 2023, hale’u tuku 11:00 Otl, hodi rona  medida koasaun mak sei aplika bá arguidu.

Prosesu primeiru interrogaróriu ne’e prezide hosi Juiz titular Ivan Suritai, Ministériu Públiku (MP) reprezenta hosi Prokuradór Renato Bere-Naha, Advogadu privádu Miguel Acáçio Faria, inklui advogada feto na’in-rua seluk tán.

Iha Tersa, 14 fulan-Fevereiru 2023, haleu tuku 18:00, lOtl, Polísia Nasionál Timor-Leste (PNTL) ezekuta mandadu kapturasaun hosi Tribunál Distritál Dili (TDD) bá arguidu JC  bá kazu ho númeru úniku kriminál  (NUK) 0016/23, tanba arguidu komete krime abuzu seksuál hasoru minoridade previstu iha artigu 177 lei Kódigu Prosesu Penál.

Tuir informasaun hosi Polísia Nasionál bá Servisu Investigasaun Kriminál (PNSIK), katak, kapturasaun bá arguidu JC ne’e hala’o hosi ekipa konjunta kompostu.

Jornalista: Rogério Pereira Cárceres