Hatutan.com, (22 Janeiru 2023), Díli—Komunidade sira iha Díli laran, liuliu na’in bá transporte privadu no transporte públiku sira, Domingu loro-kraik  to’o fali kalan ne’e (22/01/2023),  forma naruk enxe kombustivel iha estasaun kombustivel sira iha Díli laran tanba pániku ho  ‘rumor’ balun dehan, Timor-Leste atu krize kombustivel.

Lee Mós : Breaking News: ETO Husu Povu Labele Pániku Tanba Sei La Akontese Krize Kombustivel

Komunidade Díli, liu-liu hirak ho transporte privadu no transporte públiku (motór & karreta) forma naruk iha estasaun kombustivel ETO iha Hali-Laran, Díli, Domingu (22/01/2023). Foto/Espesiál

Tuir observasaun Hatutan.com nian iha sentru kombustivel sira hanesan iha Estasaun Kombustivel Esperansa Timoroan  (ETO) iha Bebora, iha Hali-Laran, no iha Luro-Mata no estasaun kombustivel sira hanesan iha Becora, balun iha Fomento (Belack Fuel)  no balun iha Comoro, komunidade sira ho sira-nia transporte privadu no transporte públiku (motór ho karreta) forma naruk iha estasaun kombustivel sira hodi enxe kombustivel bá sira-nia transporte.

Komunidade balun lori jerigen bá enxe kombustivel hanesan gazóleu ho gazolina, tanba sira rona informasaun hosi ibun ba ibun katak, daudaun ne’e kombustivel sira la iha ona  ka Timor atu monu daudaun bá krize kombustivel.

To’o kalan ne’e, hale’u tuku 21:32 Otl, karreta ho motór kontinua forma naruk iha estasaun kombustivel sira iha Díli laran. Nune’e, tuir mós observasaun Hatutan.com nian iha estasaun kombustivel balun hanesan iha Becora to’o mai parte Kulu-hun, tesik bá to’o fali área Hudi-laran nian, momentu ne’e taka hela sira-nia portaun. Inklui estasaun kombustivel Aitula Fuel taka portaun.  

Informasaun ne’ebé Hatutan.com asesu hosi fontes balun katak momentu ne’e kombustivel liuliu gazolina iha PERTAMINA INTERNASIONAL Timor S.A  (PITSA) laiha. Maibé gazóleu sufisiente  no barak hela. Nune’e, estasaun kombustivel balun ne’ebé sosa kombustivel hosi PERTAMINA INTERNASIONAL Timor S.A ladún iha stoke gazolina sufisiente, nune’e sira balun taka no la fa’an gazolina.

Fontes balun iha PERTAMINA INTERNASIONAL Timor S.A informa katak  PERTAMINA nia gazolina mak laiha duni, maibé gazóleu sei barak. Maske nune’e, garante katak Timor-Leste sei la krize mina tanba PERTAMINA INTERNASIONAL Timor S.A nia ró ne’ebé transporta kombustivel iha hela dalan mai Timor-Leste (tarde liu loron 26 fulan-Janeiru 2023).

Hosi sorin seluk, Hatutan.com halo konfirmasaun ho Diretór Ezekutivu ka CEO Esperansa Timoroan (ETO), Nilton Telmo Gusmão dos Santos,  hateten, stoke kombustivel iha estasaun kombustivel  ETO nian sufisiente atu atende povu Timor ein-jerál iha loron hirak nia laran tuir mai. Tanba ne’e, nia husu atu komunidade iha Díli laran lalika pániku  tanba kombustivel sufisiente hela.

“Ha’u fiar kombustivel sei normal bainhira ró tama. Ami sei kontinua hatama no husu atu lalika pániku hodi forma naruk fali iha estasaun kombustivel sira,” Nilton Telmo Gusmão dos Santos hateten.

Nilton hatutan, ETO sei bele garante bá loron hirak ne’e to’o ró-ahi tama aban ka bainrua kalan (segunda ka tersa kalan, 23-24/01/2023). Tan ne’e,  husu atu ema lalika pániku tanba buat hotu kontroladu hela.

Rumor sira hanesan ne’e akontese mós dala ida ona iha Timor-Leste iha loron 28 fulan-Jullu 2022.  Tempu ne’ebá ema barak pániku no forma naruk iha estasaun kombustivel sira iha Díli laran to’o fali loron tuir mai, 29 fulan-Jullu 2022.

ANPM  Husu Públiku Labele Pániku

Komunidade Díli, liu-liu hirak ho transporte privadu no transporte públiku (motór & karreta) forma naruk iha estasaun kombustivel ETO iha Hali-Laran, Díli, Domingu loraik too kalan, (22/01/2023). Foto/Espesiál

Hosi sorin seluk, Autoridade Nacional do Petróleu no Minerais (ANPM) fó sai avizu liuhosi sira-nia pájina ofisial Facebook ANPM Timor-Leste hato’o informasaun bá públiku iha Kapital Díli no iha Munisípiu hotu relasiona ba rumor husi atividade retallu kombustivel no operasaun Postu Rodoviariu Abastesimentu Kombustivel iha territóriu toma katak:

• Tamba selebrasaun Tinan Foun husi Komunidade Chinesa iha Timor-Leste, Postu Rodoviariu Abastesimentu Kombustível 7 ne’ebé hala’o atividade iha Kapital Díli hanesan Super Fuel-Kulu-hun, Chong Ti Petroleum-Kulu-hun, Kulu-hun Station-Kulu-hun, 68 Fuel Station-Hudil-aran, 99 Fuel Station-Hudil-aran, Mega Petroleum-Fatuhada no De Shun Fuel-Fatuhada sei taka sira nia operasaun hahú husi Sábadu loron 21 fulan-Janeiru 2023, hale’u tuku 14:00 no sei loke fila fali sira nia atividade ba públiku iha Segunda, 23 fulan-Janeiru, hale’u tuku 07:00 Otl.
• To’o momentu ida-ne’e abastesimentu Kombustivel iha Armazenamentu (Fuel Terminal) husi Esperansa Timor Oan (ETO) Hera no PERTAMINA INTERNASIONAL Timor, S.A (PITSA) Praia dos Coqueiros, sei sufisiente atu halo distribuisaun Kombustivel ba Postu Rodoviariu Abastesimentu Kombustivel iha territóriu laran tomak to’o sira nia kargu ne’ebé atu mai iha semana oin.
• ANPM sei emite sirkulasaun livre ba ETO nia Kargu ne’ebé tuir planu sei atraka iha ETO nia armazenamentu Kombustível Hera iha loron 23 fulan-Janeiru 2023

• ANPM sei emite sirkulasaun livre ba PITSA nia Kargu ne’ebé tuir planu sei atraka iha PITSA nia armazenamentu Kombustivel Praia dos Coqueiros Díli iha loron 26 fulan-Janeiru 2023. 

Jornalista : Rogério Pereira Cárceres