Hatutan.com, (16 Janeiru 2023), Díli—Família hosi José Bernardo ne’ebé mate iha sela PNTL Komandu Munisípiu Díli, Caicoli, ezíje justisa bá Policia Ciêntífica e de Investigação Criminal (PCIC), atu fó-sai rezultadu investigasaun bá kazu tara-an ne’e.

Inan hosi José Bernardo ne’ebé mate iha sela Komandu PNTL Caicoli, hakat ba edifisiu PCIC hodi husu rezultadu prosesu investigasaun, Segunda (16/01/2023). Foto/Elio dos Santos da Costa.

Iha Segunda (16/01/2023), haleu tuku 09:30 dadeer Otl, inan hosi matebian, Regina de Jesus Soares, akompaña ho familia balu tán, hakbesik bá iha PCIC, hodi husu konfirmasaun bá investigadór sira kona-bá progresu no rezultadu investigasaun bá kazu insidente ne’e.

Lee Mós: Investigasaun bá José Bernardo nia Mate, PDHJ Haree Liu Direitu Umanu-Boa Governasaun

Familia sira bá halo konfirmasaun, tanba to’o oras-ne’e matebian nia loron mate kompleta ona fulan-lima, maibé to’o oras-ne’e seidauk iha rezultadu ruma no parte família laiha informasaun ruma ne’ebé serteza.

“Ami husu liu rezultadu, tanba iha ne’e kleur demais ona. Ami bá husu Ministériu Públiku mós dehan seidauk. Ami mai husu fali iha PCIC mós seidauk. Sira dehan sei ezame nafatin, lia ne’e seidauk hotu de’it. Ne’e mak ami husu nafatin, tanba ha’u nia ona ne’e mate kleur loos ona, atu tama fulan-lima ona. Ida-ne’e mak ha’u husu,” Inan hosi matebian, Regina de Jesus Soares, hateten iha PCIC Caicoli.

Família ninia ezijénsia maka justisa loloos bá ema sira ne’ebé deskonfia hakotu nia oan ninia vida iha sela laran, tanba sira nia oan ne’e, la’ós hanesan animál ne’ebé mate karik, sasán na’in ladun preokupa atu buka.

Tuir inan hosi matebian ne’e katak, sé nia oan mate liur karik ka tanba asidente ho motór ka karreta, ida-ne’e tanba família sira mós la hatene no prosesu investigasaun bá kazu ne’e, bele dura to’o tinan ida ka rua mós normál.

Durante ne’e parte família hato’o ezijénsia bebeik ona autoridade polisiál kona-bá rezultadu hosi kazu ne’e, maibé laiha resposta ruma serteza bá familia. Dala-barak, resposta hosi parte PCIC hatán de’it katak, prosesu bá kazu ne’e la’o hela.

“Ha’u mai husu atu aselera rezultadu investigasaun ne’e tanba bá sira nia uma, han-hemu kontente ho sira nia familia, mais ha’u atu bolu ha’u nia oan iha ne’ebé. Ida-ne’e mak ha’u ezije no ha’u hakarak atu aselera lalais prosesu ne’e to’o lalais nia rohan. Ohin sira promete dehan 30 dias, ha’u he’in to’o 30 dias. Sé laiha nafatin, nu’udár inan ha’u sei mai ezíje nafatin, animal mak lakon,  ha’u sei buka, sá tán ema, ha’u nia oan. Ha’u sei husu nafatin mak ida ne’e de’it. Lei no justisa ne’e bá ha’u nia oan laiha ka la’e,” Regina de Jesus Soares hateten.

Hatutan.com tenta halo konfirmasaun ho Adjuntu PCIC, Adino Nunes Cabral maibé labele fó komentáriu ruma tanba prosesu investigasaun sei la’o no ida-ne’e halo parte bá segredu justisa.

Jornalista: Rogério Pereira Cárceres