Hatutan.com, (16 Janeiru 2023), Díli—Autoridade Seguransa kompostu hosi Membru Polísia Nasionál Timor Leste (PNTL) serbisu hamutuk ho Servisu Nasionál Intelijênsia (SNI) inklui FALINTIL Forsa Defeza Timor Leste (F-FDTL), rekolla kilat tolu ho munisões lubuk ida iha rezidénsia eis Ministru Interiór, Longuinhos Monteiro iha área Loes, Postu Administrativu Maubara, munisípiu Likisá, Segunda (16/01/2023).

Autoridade Seguransa foti sai kilat tolu ho munisões iha rezidénsia eis Ministru Interiór, Loguinhos Monteiro iha área Loes, Postu Administrativu Maubara, munisípiu Likisá, Segunda (16/01/2023). Foto/repro RTTL.

Tuir publikasaun Lusa, Longuinhos Monteiro hateten nia laiha koñesimentu bainhira autoridade seguransa ba halo buska iha ninia rezidénsia no laiha karta autorizasaun ka karta buska ruma.

Lee Mós: Vise-MI Husu Komunidade iha Fronteira Hapara Importasaun Kilat-Anin

Maski nune’e, nia rasik mai entrega an hodi presta deklarasaun iha parte Polícia Cientifica Investigação Criminál (PCIC) kona-bá ne’e.

“Bainhira sira halo buska ba ha’u nia rezidénsia ha’u laiha fatin. Tanba ne’e, ha’u mai iha PCIC atu presta deklarasaun no buka hatene kona-bá buska ne’e,” Hatutan.com sita deklarasaun Longuinhos Monteiro bá Lusa.

Informasaun seluk ne’ebé Hatutan.com asesu hosi parte seguransa katak, forsa konjunta ne’ebé halo buska iha rezidénsia Longuinhos Monteiro mak hanesan J2, Polísia Militár, N2 Navál FALINTIL Forsa Defeza Timor Leste (F FDTL), Polísia Militár no Polísia Sientífika Investigasaun Kriminál.

Iha Buska ne’e konsege rekolla kilat boot tolu, pistola ida, rama automatika ho munisões bá kilat J3, M16 no pistola glock19.

Oras-ne’e daudaun kilat ho munisões hirak ne’e iha ona parte seguransa nia liman no submete ona bá prosesu investigasaun nia laran.

Longuingos Monteiro mós deklara ba Lusa katak, nia la satisfeitu ho atuasaun ne’ebé forsa konjunta ne’e halo tanba laiha karda mandadu buska ruma.

Longuinhos Monteiro, hanesan eis Ministru Interiór, antes ne’e assume kargu hanesan Prokuradór Jerál Repúblika no hanesan mós eis Komandante Jeral PNTL.

Jornalista: Rogério Pereira Cárceres