Hatutan.com, (12 Janeiru 2023), Díli-Governu liuhosi Vise-Ministru Interior (VMI), António Armindo, orienta no dezafia komandu Polisia Nasionál Timor-Leste (PNTL), liuhosi ekipa sira servisu informasaun nian, atu halo serbisu ho extra, lokaliza lalais subar fatin autór ne’ebé oho Isaac Baptista Hornai.

Lee Mós : Kazu Omisídiu iha Delta-Elemloi, Komisaun B Husu Buka Tuir Lalais Autór

Vise-Ministru Interiór, António Armindo. Foto/Hatutan.com

Vise-Ministru Interior (VMI), António Armindo dehan, hahú kedan iha Sesta (06/01/2023),  bainhira kazu omesídiu ne’e mosu iha área Delta-Elemloi, Ministériu Interior ninia orientasaun bá komandu PNTL kalru, katak, labele husik lívre, maibé tenke kaptura lalais autór sira.

“Governu ninia orientasaun, klaru. Dehan katak, lae, kazu ne’ebé mak akontese ne’e, ida, ami hakarak suspeitu ne’e tenke kaer. Rua, tenke asegura katak, sidadaun hothotu sente hakmatek. Ne’e mak orientasaun Governu mak ida ne’e,” António Armindo, hateten bá jornalista iha nia kna’ar fatin Vila-verde, Díli, Kinta (12/01/2023).

Hatán kona-bá oinsá Vise-Ministru Interior ninia haree bá servisu hosi ekipa sira intelijénsia nian ne’e, rigor ka lae, atu buka no deskobre lalaís paradeiru hosi autór sira bá kazu omesídiu nian, António Armindo dehan, informasaun ne’ebé rekolla iha terrenu, la’ós haruka bá nia, ka bá ministru interior, maibé, ekipa intelijénsia sira rekolla ne’e, relata bá sira ninia komandu.

Vise-Ministru Interior ne’e dehan, komandante jerál PNTL ho ninia komandu sira maka buka meiu halo nusá, para bele kaptura lalais autór prinispál, tanba sira mak iha nivel operasaun, tátika, sira hatene oinsá mak atu halo orientasaun ida ne’e bele alkansa.

“Bá ha’u, lakohi atu fó komentáriu kona-bá servisu intelijénsia sira nian. Só ke, hanesan ha’u husu de’it bá komandu mak ne’e, orientasaun lorloron sempre iha. Katak, komandu tenke servisu extra para oinsá suspeitu ida-ne’e bele kaer,” António Armindo hateten.

Jornalista: Rogério Pereira Cárceres